Asturies esixe al Gobiernu en funciones la convocatoria urxente d'una Conferencia Sectorial d'Educación

|

Doce comunidaes autónomes, ente les que ta Asturies, reclamen nuna carta al ministru una respuesta conxunta a l'aplicación de la LOMCE. "Esisten munches incógnites sobre la so aplicación y munchu esmolecimientu al rodiu la norma", señala Genaro Alonso.

"De mou inmediatu, tenemos les reválides de sestu de Primaria, que nun deseamos aplicar, pero la LOMCE indica que son obligatories”, añadió'l reponsable de la Conseyería d'Educación y Cultura. La decisión de solicitar una conferencia sectorial alcordáronlo doce comunidaes mientres la Comisión Xeneral d'Educación celebrada'l martes.

Tamién pautaron celebrar una comisión nueva nun plazu de diez díes y instar al Gobiernu estatal a que convoque la conferencia sectorial nel trescurso de los cinco días posteriores a esi alcuentru nuevu. Les cuestiones a tratar son les siguientes: evaluación xeneral de sestu de Primaria, itinerarios de cuartu de la ESO, titulación en FP Básica y acceso a estudios postobligatorios, accesu a los ciclos de FP de grau mediu y grau superior, prueba xeneral de cuartu de la ESO, prueba final de Bachilleratu y accesu a la universidá, y financiación de les actuaciones non previstes na memoria económica de la LOMCE.

Amás de p'analizar de forma conxunta todos estos asuntos, la Conferencia Sectorial d'Educación debería servir p'aprobar los criterios de distribución del presupuestu asignáu a los diferentes programes de cooperación territorial.

Contador Estadistiques