Alonso niégase a participar en nengún alcuentru billateral con Méndez de Vigo hasta que nun convoque la Conferencia Sectorial d'Educación

El Gobiernu denuncia'l “desconciertu” que xenera'l Gobiernu de Mariano Rajoy na aplicación de la LOMCE y pide qu’entaine na convocatoria de la Conferencia Sectorial d'Educación. El conseyeru Genaro Alonso niégase a participar en nengún alcuentru billateral col ministru Íñigo Méndez de Vigo hasta esi momentu.

El titular d'Educación y Cultura demanda con urxencia una Conferencia Sectorial d'Eduación pa salvar les incertidumes sobre la implantación de la Llei Orgánica pa la Meyora de la Calidá Educativa (LOMCE), dalgo que tamién sofiten otres once comunidaes autónomes, como espresaron públicamente'l pasáu 5 d'abril. Sicasí, la postura d'Íñigo Méndez de Vigo ye la de nun atander esti pidimientu: “En cuenta d’ello quier caltener xuntes billaterales colos conseyeros y convocó pal 21 d'abril un grupu de trabayu”, esplicó Alonso.

El conseyeru anunció l'unvíu d'un escritu al Ministeriu d'Educación, Cultural y Deporte nel que va insistir na necesidá de convocar cuanto primero a tolos responsables educativos autonómicos y va comunicar a Méndez de Vigo que nun va asistir a la citada xunta, al considerala una “maniobra”, al igual que nin a nengún alcuentru billateral. Tamién señaló que, nel casu de que'l Gobiernu de Rajoy nun atienda estes demandes primero que concluya'l mes d'abril, les doce comunidaes autónomes más crítiques cola reforma educativa van caltener un alcuentru la primer selmana de mayu cola cuenta d'adoptar les decisiones que sían menester pa desaniciar los efectos negativos de la LOMCE.