Asturies acoyó a 65 refuxaos nel añu últimu

El númberu de refuxaos qu’acoyó Asturies dende xunetu del añu pasáu ye de 65 tres la llegada al país d’una familia iraquina de cuatro miembros, dos adultos y dos menores, esti xueves. L’Estáu español ta mui lloñe de cumplir el so compromisu de recibir a 17.337 persones enantes del 27 de setiembre.

Accem va ser la ONG que se va facer cargu d'estos movíos procedentes de Grecia por cuenta de la crisis provocada pola guerra de Siria. Estos dos países, xunto con Eritrea y la República Centroafricana son los d’orixe de les persones que s'asitiaron hasta agora nel nuesu territoriu, magar que toes elles llegaron procedentes de reubicaciones o reasentamientos temporales.

La familia iraquina lo mesmo que'l restu de movíos yá reasitiaos, va disponer d'atención sanitaria, escolarización pa los menores y cobertoria por parte de los servicios sociales nacionales y municipales, prestaciones que garantiza'l Protocolu de Coordinación y Actuación pa l'Acoyida de Persones Abellugaes ellaboráu pol Gobiernu. Esti marcu d'intervención ye una ferramienta efeutiva que permite coordinar tolos recursos y departamentos de l'Alministración cola fin de facilitar la plena integración de les persones abellugaes.

L’Executivu asturianu vien reclamando al central un mayor esfuerciu p'acoyer a movíos. El compromisu del Gobiernu de Mariano Rajoy yera’l d’acoyer a 17.337 refuxaos enantes del 27 de setiembre, cifra mui lloñe d’algamar yá que nun se completó nin el 10 por cientu de la mesma.

Accem tien la intención de sumar 87 places más d’acoyida enantes de fin d’añu pa sumar, xunto cola Cruz Bermeya, 221 en total.