Ástures y romanos vense les cares en Carabanzo

El sábadu, Nueche Astur con Los Berrones y Skama la Rede. Les carroces de Valdesoto, el Festival de la Sidra en Navia y el final de la Selmana Grande de Xixón, otros eventos.

Depués d'años de derrotes llocales, siendo fiel a la historia, el Festival Astur Romano de Carabanzo da esperances a los ástures pa la batalla contra los romanos, prevista pa les 14 hores del domingu na parte alta del pueblu ḷḷenizu. La organización abrió una votación per redes sociales, que fina güei, na que-y entruga a los sos fieles qué bandu quier que gane: ástures o romanos. Si too trescuerre como paez, podría haber sorpresa nesta ocasión.

Hasta esi momentu, la folixa va tomar Carabanzo con delles actividaes que, nesta edición, van centrase nel sábadu y nel domingu. Na nueche de mañana va celebrase la yá tradicional Nueche Astur, a partir de les 23.30 hores, que va contar cola participación de Black Coffee, Los Berrones y Skama la Rede, con sesión de discoteca hasta l'alborada darréu. Como ye vezu, la organización dispón d'autocares ente la folixa y La Pola Ḷḷena, Uxo y Mieres, amás d'un prau pa los que quieran acampar nel llugar.

San Félix en Valdesoto

Son munches les poblaciones asturianes que celebren folixes esta fin de selmana, ente elles Valdesoto, que festexa a San Félix. Dende güei tán programaes múltiples actividaes y verbenes con Cover (güei) y Aramio y Capitol (mañana), amás de discoteca'l domingu, anque'l día grande ye'l llunes.

Nesta xornada va celebrase'l siempre atractivu desfile de carroces, de magar les 17 hores, pa depués continuar cola xira, que va tar amenizada pola orquesta gallega Tango y l'asturiana Versión Original.

Selmana Grande de Xixón

Xixón afronta'l tramu final de la so Selmana Grande con enllenos en chigres y hoteles. Los conciertos na Plaza Mayor y la sablera d'El Natahoyo de güei y mañana van ser el preludiu de los Nueche de los Fueos Artificiales del domingu. Van poner el ramu a los festexos xixoneses la Danza Prima y el Restallón, previstos pa les 14 hores nel Muro y na playa de San Llorienzu.

Sicasí, el branu nun apara na villa y son munchos los eventos previstos pa estos díes d'agostu. El qu'atrae más xente ye, ensin dulda, la Feria Internacional de Muestres d'Asturies (FIDMA), que va allargase hasta'l domingu 21.

San Roque en Llanes

Tamién habrá fueos artificiales en Llanes, nesti casu'l martes, día grande de les fiestes de San Roque. Por embargu, l'actividá festiva adelántase a estos díes, con dos verbenes (domingu, con bandes tributu a Héroes del Silencio y Creedence Clearwater Revival, amás de la orquesta Dominó; y llunes, con Stereo y Coliseum). El martes, tres los fueos, el protagonismu va ser pa les orquestes Elite y Panamá.

Ye de destacar tamién l'actuación de la Bandina del Llacín esta tarde, a les 20 hores, na Plaza de los Bandos, y los cantares populares de chigre colos que'l grupu vocal Ecos del Cuera va animar la nueche del sábadu nes sidreríes de la villa.

La Nuesa Señora d'Andrín

Mui cerca de Llanes, n'Andrín, tamién hai fiestes. Éstes destaquen esti añu por ufrir el que quiciabes sía'l meyor cartelu de bandes folk n'Asturies d'esti añu. Asina, mañama ta programada l'actuación de Corquiéu, Felpeyeu y Llan de Cubel, dende les 18 hores, y el domingu, dende les 20.30, de Tejedor y los gallegos Milladoiro. Amás, el sábadu tamién va haber espaciu pal rock con Los Cómodos y Jimmy Barnatán & The Cocooners.

Festival de la Sidra en Navia

Güei celebrase'l XVI Festival de la Sidra en Navia, qu'entama La Banda del Militrón, con actividá dende les 13 hores na esplanada del muelle de Navia. Una actuación del Cuarteto Torner va amenizar la preba de sidra matutina, que tener continuación de magar les 19.30 hores. Pa disfrutar de la nuesa bébora nacional namái ye necesario mercar el vasu oficial de la folixa, que tien un costu de 2 euros.

Puestinos de productos asturianos completen la ufierta d'esti certame que va zarrase tres l'actuación de Duerna y El Koku la Manzana.