Arxentina, Chile, México, Estaos Xuníos y España van tar representaes na Escuela de Branu d’Asturianía

|
Guillermo Martínez y Begoña Serrano na clausura de la Escuela d'Asturianía 2016

Venticuatro moces y mozos descendientes d’asturianos emigraos van participar na sesta edición de la Escuela de Branu d’Asturianía. Ésta va desendolcase del 18 d’esti mes al 3 d’agostu con representantes procedentes de centros asturianos y cases d'Asturies d'Arxentina, Chile, México, Estaos Xuníos y España.

Profesores de la Escuela de Música Tradicional d’Uviéu van impartir la programación, que inclúi tamién actividaes na rede de centros y cases d’Asturies. Clases de percusión, cultura y llingua asturiana, sociedá y polítiques sociales venceyaes cola emigración son les temes que se traten nesta iniciativa cola que se pretende averar la cultura del país a descendientes d’asturianos n’otros puntos del planeta cola fin de que treslladen posteriormente los sos conocimientos adquiríos a les sos coleutividaes d’orixe.

Nesta edición nueva los alumnos proceden de 15 centros y cases d'Asturies: 10 son orixinarios d'Arxentina y socios de los centros de Siero y Noreña, Bonos Aires, Santa Fe, La Plata, Paraná, Rosario y Comodoro-Rivadavia; 4, de Chile (Valparaíso y Colectividad Asturiana de Chile); 2, de México (Distritu Federal); y 1 d’Estaos Xuníos (Miami), amás de mozos y moces de les coleutividaes d’Alicante, Alcobendas, Madrid, Guadarrama y Valladolid.

Dende la so creación nel 2002, la Escuela de Branu d’Asturianía formó a un centenar de docentes en cultura asturiana y impulsó la creación y la continuidá de grupos de baille y bandes de música en más d'una decena de países. Otra manera, el Gobiernu, que dedica a esti programa 66.844 euros, estama tamién esti añu seis cursos de cultura tradicional asturiana: 4 en centros y coleutividaes d'Estáu y 2 nel esterior, que tamién van ser impartíos por profesáu de la Escuela de Música Tradicional d'Uviéu.

Na semeya, participantes na quinta edición de la Escuela de Branu d'Asturianía.

Contador Estadistiques