13 de los 24 alumnos de la Escuela de Branu d'Asturianía van facer la especialidá de baille

|
Sesta promoción de la Escuela de Branu d'Asturianía

Procedentes de centros asturianos en dellos países americanos y España, los once emigrantes restantes van cursar la de gaita.

El segundu cursu de la sesta edición de la Escuela de Branu d'Asturianía va celebrase en xunetu. Les 24 alumnes y alumnos del añu pasáu van repetir nesta iniciativa de sofitu a la emigración dende la so puesta en marcha nel 2002 compuesta por trés cursos y empobinada a la formación de monitores en cultura asturiana nes especialidaes de baille tradicional y gaita pa que se conviertan en profesores de dambes disciplines nos sos llugares d'orixe.

Diez de los 24 asistentes proceden d'Arxentina (Tucumán, Buenos Aires, Santa Fe, Comodoro Rivadavia, La Plata y Paraná), cuatro de Chile (Santiago de Chile y Valparaíso) y dos de México (Ciudá de México), mentes qu'Uruguai (Montevideo) y Estaos Xuníos (Miami) tienen un representante. Tamién acuden cinco persones de los centros asturianos y cases d'Asturies en Madrid, Alcobendas, Guadarrama, Valladolid y Alacant.

Pa poder costiar el viaxe y la estancia n'Asturies de los participantes na Escuela de Branu d'Asturianía, el Gobiernu destina una partida de subvenciones de 52.900 euros.

Ayudes a emigrantes retornaos

L'Executivu tamién autorizó seis ayudes pa persones retornaes por importe de 8.000 euros. Esti ye'l primer espediente de subvenciones a la torna concedíes esti añu a emigrantes asturianos o descendientes que s'atopen en situación de precariedá económica, llaboral y social y que decidieron asitiase nel país, de los que cuatro vivíen en Venezuela, otru en México y el restante en Brasil.

Na semeya, les alumnes y alumnos d'esta promoción de la Escuela de Branu d'Asturiania el xunetu pasáu xunto colos sos profesores y representantes políticos.

Contador Estadistiques