Arrancó la campaña eleutoral de les estatales del 23-X con once candidatures, dos menos que nes anteriores

Dos meses depués, los partíos entren otra vuelta en campaña eleutoral, nesta ocasión pa les eleiciones estatales adelantaes pol presidente Pedro Sánchez. El 23 de xunetu les asturianes y asturianos van poder escoyer ente once candidatures pal Congresu, dos menos que’l 10-P del 2019, mentes que son diez los partíos que se presenten al Senáu.

Esta medianueche arrancó la campaña eleutoral del 23-X cola tradicional pegada de cartelo que cada vez menos empleguen los partíos, cola mayor parte de tablones instalaos en ciudaes como Xixón vacíos. Los tiempos nuevos lleven a les formaciones, sobre manera les más pequeñes, a emplegar ferramientes dixitales pa llegar a los ciudadanos.

Son once les candidatures que se presenten al Congresu nesta ocasión, dos menos que’l 10 de payares del 2019, última cita de les xenerales y segunda d’esi añu. Ente les ausencies rescampla la d’Andecha Astur, fixa en toles convocatories eleutorales dende los años 90 al entender que “ye prioritario siguir col nuesu procesu d’acumulación de fuercies y aniciu d’un frente común asturianu, que non nun podemos permitir que seya interrumpíu por una dinámica politica estatal de la que nun esperamos nada y que ca vegada ta más distante de los intereses de los asturianos y asturianes”.

La premura na convocatoria de les eleiciones, al día siguiente de les nacionales y conceyiles del 28-M, y el contestu políticu tamién lleven a Foro, que nes anteriores fora en coalición col Partido Popular (PP), a decidir nun presentase. Los populares lleven como candidata por Asturies al Congresu a María Esther Llamazares, mentes que’l PSOE repite con Adriana Lastra.

L’otru partíu con representación, VOX, tamién presenta la mesma cara, José María Figaredo. Mentes, Xuníes Podemos, la coalición d’Izquierda Xunida (IX) y la formación morada, nun acude como tal, sinón qu’entrambos partíos integráronse na coalición Sumar xunto con Más País y otros munchos de tol Estáu, ente ellos Izquierda Asturiana (IAS), con Rafael Cofiño, ex direutor xeneral de Salú Pública nel entamu de la pandemia de COVID-19, como cabeza de llista.

Trés partíos acuden per primer vegada

Estrénense tamién nunes estatales Asturias Existe-España Vaciada, con Raquel López Murias como candidata; el Frente Obrero, que presenta a Samuel González Barchin; y el Partido Unionista Estado de España (PUEDE), con José Luis Zapico Martínez. Mentes repiten el Partido Animalista con el Medio Ambiente (PACMA), con Cristina Muslera; el Partido Comunista de los Trabajadores de España (PCTE), con José Iván Fernández Andrade; Por Un Mundo Más Justo (PUM+J), con José Ramón Bahamonde Nava; y Recortes Cero, nesta ocasión ensin el Grupo Verde, con María de les Mercedes de la Torre.

Por contra, nun se presenta nesta ocasión, Ciudadanos, que nel 2019 acudiera a les eleiciones con José Ignacio Prendes; el Partido Humanista, con José Antonio Gómez como cabeza de llista; y el Partido Comunista de los Pueblos de España (PCPE), que llevara a María González Suárez.

La Cámara Alta

Nel casu del Senáu l’eleutoráu va poder escoyer trés candidatos de les mesmes coaliciones o partíos que van al Senáu, cola esceición única del Frente Obrero. Los cabezaleros de cada llista son María Fernández Álvarez (PSOE), Pablo González (PP), María Aránzazu Martínez Riola (VOX), Faustino Sabio (Sumar), Sandra Antonia Álvarez Martínez (PACMA), Raúl Martínez Turrero (PCTE), Lorenzo Rodríguez Rivero (PUM+J), Ángel Fernández Santos (PUEDE), Elena Inmaculada Lomba (Asturias Existe) y José Manuel Cancio (Recortes Cero).