23-X: Dos bloques en disputa del Gobiernu

Esti domingu celébrense les eleiciones estatales, nes qu'Asturies elixe siete diputaos y cuatro senadores. Los pautos paecen inevitables.

Cuasi dos meses depués de les conceyiles y nacionales, les asturianes y asturianos tornen a ser llamaos a les urnes. La convocatoria anticipada de les xenerales decretada pol socialista Pedro Sánchez al día siguiente del 28-M lleven a la celebración de les mesmes en plenu periodu vacacional, lo que fixo aumentar de manera considerable'l votu por corréu: de los 19.673 qu'emplegaron esta vía en payares del 2019 pasó a los 53.646 que lo fixeran hasta ayeri –el plazu finalmente amplióse hasta les 14 hores de güei y entovía nun se dieron los datos oficiales–.

Once partíos o coaliciones preséntense por Asturies al Congresu. Son el PSOE, con Adriana Lastra como candidata; PP, con María Esther Llamazares; Sumar, con Rafael Cofiño; y VOX, con José María Figaredo, los cuatro con representación anguaño –les formaciones que participaron en Xuníes Podemos integráronse en Sumar–, y Frente Obrero, con Samuel González Barchin, Partido Animalista con el Medio Ambiente (PACMA), con Cristina Muslera; el Partido Comunista de los Trabajadores de España (PCTE), con José Iván Fernández Andrade; Por Un Mundo Más Justo (PUM+J), con José Ramón Bahamonde Nava; el Partido Unionista Estado de España (PUEDE), con José Luis Zapico Martínez; Asturias Existe-España Vaciada, con Raquel López Murias; y Recortes Cero, con María de les Mercedes de la Torre.

Al Senáu, mentes, acuden les mesmes formaciones cola esceición del Frente Obrero. Los cabezaleros de cada llista son María Fernández Álvarez (PSOE), Pablo González (PP), María Aránzazu Martínez Riola (VOX), Faustino Sabio (Sumar), Sandra Antonia Álvarez Martínez (PACMA), Raúl Martínez Turrero (PCTE), Lorenzo Rodríguez Rivero (PUM+J), Ángel Fernández Santos (PUEDE), Elena Inmaculada Lomba (Asturias Existe) y José Manuel Cancio (Recortes Cero).

959.002 asturianes y asturianos con derechu a votu

N'Asturies un total de 959.002 persones tienen derechu a votu'l 23-X, de les que 123.355 tán inscrites nel Censu de Residentes Ausentes (CERA). Éstes tuvieron hasta ayeri pa exercelu.

El domingu los colexos eleutorales van tar abiertos de 9 a 20 hores, momentu nel que va arrancar el recuentu de votos, que se va poder siguir al traviés d'esta páxina web o una aplicación pa dispositivos móviles creada pa la ocasión. A les 14 y a les 18 hores va comunicase l'avance de participación.

Izquierda y derecha

Les encuestes asoleyaes estes selmanes dan la victoria al PP, que necesitaría de VOX pa gobernar, cola esceición de les del CIS, que pon como primera fuercia al PSOE, que repetería gobiernu de coalición, agora con Sumar. Dos bloques claros enfrentaos, izquierda y derecha, situación que podría llevar a una mayor movilización del eleutoráu.

Na semeya, un colexu eleutoral el 28-M.