Aprobóse la toponimia ayerana

L'espediente, ún de los más abegosos na so tramitación pola oposición del PP, recibió ayeri'l preste del plenu ayerán.

El culebrón que vivió Ayer col procesu de recuperación de la so toponimia tradicional remató ayeri nun plenu en que los conceyales del PP votaron en contra de la propuesta de la Xunta de toponimia al nun atendese la so esixencia de que toles formes fueren billingües, calteniendo en toes elles la forma en castellanu al llau de l'asturiana tradicional, una postura que'l conceyal de cultura Santos Fanjul interpretó como "un intentu de desvirtuar la llei d'usu y el conceptu de normalización"

En cuantes al conteníu del espediente toponímicu, que yá recibiere'l preste de la comisión informativa, como adelantó nel so día Asturies.com y onde s'aprebó colos votos al favor de PSOE y IX-BA y cola abstención del PP, namás esisten dellos cambeos sobre la propuesta orixinal de la Xunta de Toponimia, al caltenese les denominaciones dobles Cabañaquinta - Cabanaquinta y Morea - Moreda, mientres que s'atendió la pitición de los vecinos de "La Pola del Pino" pa recuperar el nome tradicional de "La Pola Vieya", una denominación qu'apaez conseñada en documentación antigua anque nun se dea n'actualidá un usu popular de la mesma. Agora queda pendiente'l pasu del espediente pol Conseyu de Gobiernu d'Asturies.