Aporta la Navidá

|
Aporta la Navidá

Empieza'l Nadal con tradiciones recuperaes, L'Anguleru y actividaes per toda Asturies.

Ente’l 25 d’avientu y el 6 de xineru celébrase la Navidá, periodu que realmente comienza a celebrase muncho enantes na sociedá moderna. La nueche del 24 al 25 ye la Nuechebona, na que na tradición asturiana predominaba la carne y los dulces típicos d'esta época, como les casadielles o bollines.

Tamién en Nadal entamábanse tradiciones típiques d'esti tiempu, la mayoría yá desaniciaes. Ente les que tán agora recuperándose destaca'l Nataliegu, un tueru que se quema en Nuechebona, o'l ramu, sobre manera en Lleón, una decoración típica d'estes feches.

Nesta época tamién comiencen a celebrase les mazcaraes d'iviernu o aguilandeiros. Tres el de Los Aguilandeiros de San Xuan de Villapañada, que tuvo llugar la fin de selmana pasada, van continuar con Os Reises del Valledor (30 d'avientu), El Guirria (1 de xineru), Os Reises de Tormaleo (6 de xineru); y el 'Domingu de Sidros y Comedies' (7 de xineru).

La xente mozo tamién va poder disfrutar d'actividaes en llingua asturiana nesti tiempu gracies al festival 'Escenines pa la Reciella' en Xixón. Comienza'l miércoles 27 cola representación de 'Contábenmelo en casa', de Martín Peña y Carlos Alba 'Cellero', y va siguir el xueves cola obra 'De qué color ye'l sol', de Kamante Teatru, y el vienres con 'La neña de les trences al revés', d'El Callejón del Gato, toes elles a les 19 hores nel salón d'actos del Centru de Cultura Antiguu Institutu.

'Escenines pa la Reciella' va completase'l col conciertu de presentación de 'Bestiariu 3', que va tener llugar el sábadu al meudía nel salón d'actos del Colexu Públicu Xovellanos. Toles actividaes son de baldre hasta completar aforu.

L'Anguleru

La llegada de L'Anguleru, qu'aporta a Asturies tolos 24 d'avientu procedente del mar de los Sargazos per L'Arena, ye ún de los momentos más esperaos del Nadal, sobre manera pa los más pequeños. Esti añu esti personaxe navidiegu que reparte regalos en Nuechebona anunció esta ocasión qu'adelanta en dos díes la so llegada y que va tar en Xixón a les 19.30 hores d'esta tarde, con parada prevista nel Acuariu.

Mañana, mentes, va acudir xunto cola so collacia Lolina la Rulera n'Avilés, onde va visitar la Casa Conceyu al meudía. Darréu, a les 12.50 hores, va desfilar xunto colos Llendorinos del Tambor de la Bandina Infantil San Pedro en direición a la Biblioteca Infantil Bances Candamo pa facer l'encatamientu del serazu máxicu y falar colos presentes.

Yá'l domingu va tornar a la so cita coles neñes y neños de L'Arena y va participar na cabalgata que va dar comienzu a les 18 hores.

Especial Navidá 2017

En 'A la gueta los sueños' ufrimos l'especial Navidá 2017, con información sobre esta celebración y los aspeutos más importantes d'ella.

Contador Estadistiques