Andecha Astur va entamar un referéndum simbólicu'l Día d'Asturies

Va celebrase na plaza la Catedral d'Uviéu y con él pretende reivindicar el derechu a decidir d'asturianos y asturianes.

Andecha Astur quier denunciar con esti actu "la situación que carecemos n’Asturies, onde se mos impunxo dende Madrid un ente autonómicu, el 'Principado', y un Estatutu d’Autonomía ensin permiti-y al pueblu asturianu’l drechu democráticu a pronunciase en referéndum, drechu que sí permitieron a gallegos, vascos, andaluces, catalanes..., y que fai de los asturianos y asturianes ciudadanos de segunda categoría". Dende la organización nacionalista entienden que la situación que se vive agora mesmo n’Asturies "nun permite falar de procesos costituyentes como’l que ta teniendo llugar en Cataluña –que por supuestu defendemos y sofitamos–, pero ello nun supón más que la necesidá de redoblar los esfuercios p’algamar una situación de reconocencia de los drechos democráticos pal nuesu pueblu".

"Algamar la soberanía, el drechu a Decidir, ye la única posibilidá de garantizar la nuesa sobrovivencia como pueblu, y de llevar alantre’l necesariu procesu de recostruición nacional y social que fine cola situación d’anguaño, onde les polítiques del Estáu español p’Asturies, cola complicidá y collaboración del 'Principado', tán destruyendo tol texíu socioeconómicu-cultural d’Asturies, y llevándomos a una situación d’auténticu xenocidiu, con decenes de miles d’asturianos obligaos a emigrar añu ente añu, y con otres tantes decenes de miles resistiendo en condiciones de paru y precariedá llaboral y social", añaden. La concentración y celebración d'esti referéndum simbólicu va celebrase a les 13.30 hores, del vienres, Día de la Nación Asturiana.

Enantes, va tener llugar la marcha que #LluchandoPolaSoberanía tien convocada a les 12.30 nel Paséu Los Álamos baxo'l lema 'Lluches vieyes pa un país nuevu'.