La manifestación del 8-S va celebrase n'Uviéu

|
Cartelu manifestación del Día de la Nación Asturiana

'Lluches vieyes pa un país nuevu' ye'l nome de la marcha qu'entama la iniciativa #LluchandoPolaSoberanía.

Uviéu repite como sede de la manifestación del Día de la Nación Asturiana, que se va completar con un actu políticu y una xinta popular. Esta actividá tien como oxetivu "amosar a la sociedá asturiana que l'apueste pola soberanía d'Asturies ye la manera de poner igua a los problemes del nuesu pueblu".

La salida de la marcha ta prevista pa les 12.30 hores del Paséu los Álamos, pa percorrer les cais del cascu vieyu y finar na Corrada l'Obispu. Nella, al igual qu'años anteriores, s'espera la participación de delles organizaciones y coleutivos sociales.

Yá de tarde, los miembros de #LluchandoPolaSoberanía van desplazase a Riosa pa instalar un puestín nel que se van esparder les demandes y el manifiestu de la movilización, que va tar disponible nos próximos díes. Nesa xornada, coincidiendo cola llegada de La Vuelta a L'Angliru'l sábadu, ta prevista la celebración d'un conciertu con Faen Versión, Nuberu, La Tarrancha, Ochobre, Avientu y Skama la Rede, que va dar comienzu a les 19 hores.

Contador Estadistiques