Andecha Astur preséntase a les Estatales

Nes convocatories últimes decidiera nun participar. Va acudir con Agora Repúbliques.

Andecha Astur va presentase a les Estatales del 28 d'abril, cita a la que van estender el so alcuerdu les formaciones polítiques que conformen la coalición Agora Repúbliques pa les Europees del 26 de mayu pa "ufiertar una alternativa política con posibilidaes reales de condicionar de forma efeutiva la política a nivel d’Estáu y avanzar nel procesu de desaniciu de la monarquía española y l’aniciu d’un procesu costituyente de repúbliques de drechos y llibertaes personales y coleutives". Continuidá de Los Pueblos Deciden, a la mesma súmase Esquerra Republicana de Catalunya (ERC) y Congreso Nacional de Canarias, que forma xunto a Unión del Pueblo y Alternativa Nacionalista Canaria la coalición eleutoral Ahora Canarias, y caltiénense EH Bildu, el Bloque Nacionalista Galego (BNG) y los aragoneses Puyalón de Cuchas.

Llucía Fernández Marqués va liderar la llista nacionalista al Congresu, mentes qu'Arturu Xosé Bermeyu va facer lo propio cola del Senáu. "La de nueso ye una candidatura de llucha poles llibertaes, escontra'l facismu y polos drechos sociales. La única opción, de fechu, que tien a Asturies comu marcu de referencia y que defenderá los drechos del pueblu asturianu" declaró Fernández Marqués.

"Namás dende’l Soberanismu sedremos quien a finar cola monarquía española", añadió Bermeyu. Anguaño Andecha Astur ta recoyendo les 1.000 firmes necesaries de persones censaes n'Asturies pa poder formalizar la candidatura, como esixe l'actual Llei Eleutoral.