Andecha Astur celebra’l sábadu’l so tradicional homenaxe a Andrés Solar

El miércoles, 27 d’avientu, cumpliéronse 33 años de la muerte del escritor Andrés Solar nun accidente de tráficu cuando namái tenía 29 años. Como ye vezu, Andecha Astur celebra un actu n’alcordanza del xixonés nel cementeriu de Deva, onde reposen los sos restos.

La organización va reivindicar “un añu más la dimensión nacionaliega d’Andrés Solar Santurio, escritor de merecíu y reconocíu prestixu nel ámbitu lliterariu asturianu del que suel tapecese’l so fondu compromisu políticu que lu llevó a ser miembru fundador del Ensame Nacionalista Astur, presentándose por esi partíu como candidatu a la Xunta Xeneral, y siendo en too momentu un referente pola so implicación, capacidá de trabayu y cualidaes personales”.  Solar, amás de pola so importante obra lliteraria, destacó pol so compromisu pa cola llingua, siendo miembru de Conceyu Bable y de la Xunta pola Defensa de la Llingua Asturiana.

L’actu d’homenaxe va tener llugar el sábadu, a les 13 hores, nel cementeriu asitiáu na parroquia xixonesa de Deva, d’ónde él yera natural. Ésti va consistir nuna ufrienda floral xunto a la placa instalada nel llugar por Andecha Astur nel 2004 y en delles intervenciones pa recordar la so memoria y creaciones lliteraries.