Ana Cano esíxe-y más pasos a Cultura

Vicente García Oliva foi l'encargáu d'entamar ayeri nel Centru de Cultura Antiguu Institutu de Xixón los actos inaugurales de la Selmana de les Lletres Asturianes en Xixón. Énte un públicu qu'enllenó'l salón d'actos del Antiguu Institutu xovellanos de Xixón y ente'l que taben presentes, García Oliva tuvo palabres d'alcordanza p'Andrés Solar Santurio, l'escritor de Deva al que se-y dedica esti añu la celebración oficial. Reconociendo la calidá y el bon nivel de tol programa d'actos que taba preparáu pa estos siete díes, García Oliva dio pasu a la intervención de la Presidenta de l'Academia de la Llingua Asturiana, Ana Cano, que dempués d'emponderar el valir lliterariu del homenaxeau y referise a Solar como modelu llingüísticu pa los demás escritores del so tiempu, llevó'l discursu hacia la situación d'allancamientu de la titulación en Filoloxía Asturiana y la cuestión de la falta d'oficialidá, midida llegal que la presidenta de l'Academia esixó que s'enxerte na prósima reforma del estatutu d'Autonomía. La presidenta de l'Alla declaró qu'ello diba ser "el meyor homenaxe que se-y pue facer" a Andrés Solar y dexó pal auditoriu, y pa los cargos políticos presentes, una frase del mesmu Solar cola que dio a entender que nun ve que se dean tolos avances que camienta precisos na política llingüística del Principáu "Nun queremos ser un pueblu enteru añando la so propia muerte"

Tres de la intervención d'Ana Cano salió a falar el primer teniente d'alcalde de la ciudá, Pedro Sanjurjo, que lleó dellos poemes d'Andrés Solar. El representante del Conceyu de Xixón adelantó tamién na so intervención que'l desapaecíu escritor diba contar con una camín col so nome na parroquia de Deva, llugar onde l'escritor pasó tola so vida y onde entovía se guarda alcordanza d'elli como persona comprometida cola vida del pueblu y motor de l'actividá social del mesmu.

Pela so parte, la conseyera de Cultura del Principáu d'Asturies, Ana Rosa Migoya, declaró ayeri na inauguración de la Selmana de les Lletres Asturianes en Xixón la so intención de dir hacia una "normalización social del asturianu que nun sea un problema pa naide". Migoya declaró que "nun hai una única manera correcta de defender la llingua asturiana, sinón munches maneres adecuaes de facelo" y señaló como parte del espíritu del alcuerdu de gobiernu "l'avanzar na normalización social con mayor presencia efectiva del asturianu na enseñanza, nos medios de comunicación y na sociedá". La conseyera apostó, nesti sentíu por "desarrollar l'usu del asturianu nel marcu del estatutu d'autonomía y de la llei de Promoción y Usu del asturianu de 1998". Dientro d'esi desarrollu del actual marcu llegal de la llingua, Ana Rosa Migoya tuvo palabres pa falar de la futura TV autonómica, comprometiéndose a que l'asturianu tuviere una presencia "digna en tiempu, cantidaes y calidaes" na futura radio y televisión autonómiques, aunque nun concretó la posibilidá d'apautar cuotes de tiempu d'emisión n'asturianu. Como en rempuesta a les pallabres de la Presidenta de l'Alla, la Conseyera dixo-yos a los periodistes que nun va llegase a la cooficialidá del idioma nesta lexislatura y que tola política llingúística va mandase polos alcuerdos de gobiernu . En desarrollu d'estos alcuerdos, la Conseyera dio anuncia de la prósima entrada en serviciu de la Xunta de Toponimia y l'aprobación, d'equí a poco, del Plan de Normalización Sociollingüísticu.
Con too y con ello, la Conseyera nun negó una hipotética oficialidá en casu de reformase l'estatutu