Ámsterdam gana a Dublín y Frankfurt como destín dende l'aeropuertu

La mesa de contratación del concursu p’aumentar la coneutividá internacional del Aeropuertu d’Asturies dende la temporada d’iviernu próxima propón l’axudicación de 6 de los 8 llotes ufiertaos, con Londres y Lisboa a la espera de más documentación. La oferta de Vueling a Ámsterdam superó a la fecha por Ryanair a Dublín.

Asturies va tener conexón con Bruxeles, Milàn, Düsseldorf, Roma y París, mentes que Londres y Lisboa tán pendientes de que Vueling y Volotea xustifiquen les sos baxes ofertes económiques presentaes por estos destinos, de manera respeutiva. Mentes, la octava ruta, pa la que’l Gobiernu propunxo Ámsterdam, Dublín o Frankfurt am Main, va ser finalmente cola capital neerlandesa, al valorase la propuesta de promoción y coneutividá fecha por Vueling.

D’esta forma, Vueling va siguir trabayando París (Orly) y suma Ámsterdam, con Londres (Gatwick) pendiente de confirmar. Ryanair, mentes, torna a Asturies pa trabayar Bruxeles, Düsseldorf y Roma.

La tercer aerollinia que participó nel concursu, Volotea, amplía pela so parte la ufierta dende l’aeródromu asturianu al incorporar a les rutes estatales actuales Milàn y, si xustifica les cantidaes solicitaes, Lisboa. Éstes dos rutes deberíen entamar a funcionar enantes de la temporada de branu del 2023, mentes que les restantes han de facelo enantes de la d'iviernu d'esti añu.