ALSA dexa d’usar la toponimia asturiana nos sos billetes

|
ALSA dexa d’usar la toponimia asturiana nos sos billetes

Tres dellos años emplegando los topónimos asturianos y castellanos nos sos billetes, ALSA tornó a dexar de sópitu fuera los tradicionales, oficiales na mayor parte de los casos. Una campaña n’Internet encamienta a la empresa a volver a la normalidá.

Víctor Suárez foi la persona que nel 2011 consiguió’l compromisu d’ALSA pa incorporar la toponimia tradicional a la páxina web de la empresa, onde entovía ta presente. Nesi tiempu tamién comenzó a apaecer nos billetes pero, dende hai unes selmanes quedó fuera d’ellos, emplegándose namái la castellana.

Esta situación nueva llevó a Suárez a entamar una campaña de recoyida de firmes al traviés de la plataforma Change.org cola fin de presionar a la compañía d’autocares pa retomar un usu que quedó anuláu pola decisión “de llendar a 10 caráuteres los nomes de los billetes impresos”, motivu pol que “la toponimia asturiana desapaez”. “Nun hai nenguna xustificación posible pa eliminar de los billetes nomes que veníen apaeciendo con normalidá. ALSA ye una empresa privada, pero con una concesión pública pal tresporte cuasi de manera esclusiva en toa Asturies”, afirma nel so pidimientu, nel qu’encamienta a la empresa a recapacitar usar otra vuelta “nomes como Oviedo/Uviéu y Gijón/Xixón”.

Nos trés díes que lleva en marcha la campaña de recoyida de firmes algamóse más de mediu centenar d’apoyos, siendo la cifra esauta nel momentu de redautar esta noticia de 618. L’oxetivu de Suárez ye algamar los 1.000 sofitos.

Contador Estadistiques