Agostu llega cargáu de folixes y eventos

La primer fin de selmana d'agostu suel venceyase al Descensu Internacional del Seya y el Xiringüelu. Sicasí, nun son los únicos eventos que van congregar multitúes estos díes, yá que tamién coincide cola celebración del Festival Intercéltico d'Occidente, l'aniciu de la FIDMA o fiestes en decenes de villes, como Xixón o Llugones.

Miles de romeros tán tomando nestos momentos Les Arriondes y Ribeseya pa disfrutar del Descensu Internacional del Seya y de la folixa que s'entama alredor de la prueba deportiva. La salida, siempre emocionante y espectacular, ta prevista pal meudía de mañana tres la llectura del pregón, a cargu de la periodista Lara Álvarez, y la interpretación en comuña del Himnu de les Piragües y el del país.  

Xiringüelu

Otra de les folixes del branu asturianu ye'l Xiringüelu, nel prau Salcéu de Pravia, onde yá hai actividá nestos momentos pa construyir les tradicionales casetes. Miles de llitros de sidra va consumise nesta fiesta que va desenlocase a lo llargo de tol domingu y al qu'acuden munchos visitantes de fuera de la villa, polo que Feve refuerza servicios nesta xornada ente Pravia y Avilés y Uviéu.

FIDO

En Tapia, mentes, continúa la celebración del Festival Intercéltico d'Occidente (FIDO). Ente les munches actividaes previstes pa estos trés díes vinientes destaca sobre manera la Noite Folk d'esta nueche dedicada a Éire, cola participación de FullSet y la Dominic Graham School of Irish Dance, y la Gran Noite Máxica de mañana, dambes na playa del Murallón de magar les 23.30 hores, amás del Murallón Folk del domingu (22.30 hores) con The Hidden Road y el vascu Xabi Aburruzaga.

Selmana Grande de Xixón y FIDMA

Lara Álvarez va facer doblete de pregones, yá que tamién va encargase d'abrir la Selmana Grande de Xixón esta tarde na Plaza Mayor a les 21 hores. Conciertos y decenes d'actividaes van desendolcase hasta'l día 15 na ciudá, destacando la llegada al Teatru Xovellanos del musical 'Priscilla', con 14 funciones.

Amás, nel Recintu Ferial Luis Adaro comienza mañana la sesentena edición de la Feria Internacional de Muestres d'Asturies (FIDMA), que como novedá tien la vuelta d'Uviéu con stand propiu tres años d'ausencia. 2.100 empreses y instituciones van tar presentes nesta ocasión nún de los eventos más mutitudinarios del branu asturianu que va contar cola presencia de la ministra d'Emplegu y Seguridá Social en funciones, Fátima Báñez, na inauguración de güei y que va allargase hasta'l domingu 21.

Fiestes d'El Carbayu

Ente les munches fiestes previstes per tola xeografía asturiana esti domingu destaquen les d'El Carbayu, en Llugones, que cumple 90 años de vida. Cinco verbenes tán previstes dende güei hasta'l martes cola presencia de les orquestes Versión Original y Los Players, güei; Assia y Waykas Family, mañana; Distrito Xoven y el grupu The Nameless, el domingu; Cuarta Calle y el grupu Rebell Fowls, el llunes; y La Fórmula y Ritmo Joven, el martes.

II Folixa en Lledíes

En Lledíes (Llanes) celebren la so segunda Folixa, con mercáu, bailles (col grupu La Xurbial), xuegos y deporte rural. Pela nueche actuarán los grupos Duerna y La Nueve.

Semeya del twitter oficial del Descensu Internacional del Seya.