El Festival Intercéltico d'Occidente estrena feches nel so venti aniversariu

|
FullSet

La cultura celta madruga nesti 2016 en Tapia con respeuto a años anteriores. La organización del Festival Intercéltico d'Occidente (FIDO) decidió adelantar a esta selmana'l certame pa nun coincidir cola Feria Campomar y acceder a meyores artistes.

En total van tomar parte nesta edición tan especial del FIDO quince formaciones procedentes d'Asturies, Galicia, Euskal Herria, Breizh, Alba, Éire y Chile. La inauguración va celebrase esta tarde, a les 19.30 hores na Plaza de la Constitución, col izáu de la bandera celta, un eventu que va poder siguise al traviés de Periscope en @FIDOFestival y nel que va tar presente'l conseyeru d'Educación y Cultura, Genaro Alonso, ente otres personalidaes llocales.

Darréu va abrise'l Mercáu Celta y, a les 20 hores, va inaugurase una muestra del coleutivu vigués Artesanía Os Alegres na sala d'esposiciones del Instituto Marqués de Casariego de Tapia que va permanecer abierta hasta'l sábadu n'horariu de de 11.30 a 13.30 y de 19 a 20.30 hores. Va completar esta primer xornada una animación de la Banda de Gaitas Marino Tapiega, entidá organizadora del FIDO, y de l'Asociación Cultural La Madreña.

Hasta'l llunes

L'actividá nel Mercáu Celta va principiar mañana al meudía con animación a cargu de la Banda de Gaitas Xarabal (Galicia). Ente los talleres previstos pa esta xornada destaca ún de pandereta gallega pol Grupo Corisco (12 hores) y ún de baille bretón (13 hores), amás d'una clase maestra de gaita pola Bagad Pays des Abers. Tamién va poder visitase la muestra 'Galicia na música' na sala de exposiciones del Instituto Marqués de Casariego de Tapia.

Yá de nueche, a les 21 hores, El Koku La Manzana y Ayalga van ufrir un conciertu folk acústicu nel parque de Tapia. La primer formación va repetir a les 23.30 hores nel puertu cola primer verbena tradicional.

El vienres l'apertura del mercáu ta prevista pa les 11 hores y, una hora más, tarde, va celebrase un homenaxe a los marineros nel mirador d'Os Cañóis, pa depués celebrar un pasucais pela villa hasta la Casa Conceyu. De tarde, a les 20 hores, va tener llugar el Festival Infantil de Cultura Celta nel puertu, cola participación del grupu de danza bretón Bleuniadur Gwenn, el grupu infantil de danza de La Madreña y el de la Escuela Municipal de Música.

Éire, mentes, va ser protagonista na Noite Folk que se va celebrar a les 23.30 hores na playa del Murallón. Nella va participar el grupu folk FullSet, qu'a les 13.15 hores tien previsto ufrir una clase maestra, y la Dominic Graham School of Irish Dance.

Gran Noite Máxica

A les 11 tamién van princiar los eventos del sábadu, xornada central del FIDO. La Madreña va ufrir un cursu de pandereta asturiana y de baille asturianu al meudía, mentes que l'animación va correr a cargu de la Banda de Gaitas Ximielgu del Centro Asturiano de Santiago de Chile. Pela tarde'l testigu va garralu la Pipe Band d'Alba, que va caldiar l'ambiente pa la Gran Noite Máxica.

L'eventu principal del FIDO, que se desendolca na playa del Murallón dende les 23.30 hores, lleva'l nome de 'El aquelarre celta' y la firma de Sara López Peláez. Nella participa'l grupu de teatru Aires Costumbristas d'A Caridá.

Alborada del mar

A les 11.30 hores, media hora depués de l'apertura del mercáu, va celebrase la 'Alborada del mar', que consiste nun pasucais per Tapia de tolos agrupaciones participantes, con parada na escultura 'Homenaxe al pescador' y final na ilesia de San Esteban, onde va oficiase una misa folclórica. A les 20 hores, el vascu Xabi Aburruzaga va ufrir una clase maestra d'acordión, pa depués protagonizar el Murallón Folk, dende les 22.30 hores, xunto con The Hidden Road, grupu ganador del I Concurso Musical del FIDO.

L'Intercéltico va clausurase finalmente'l llunes col arriáu de la bandera celta.

Na semeya, los irlandeses FullSet.

Contador Estadistiques