Afayos arqueolóxicos na Cueva’l Fornu

Nos valles del Trubia, al llau de la carrtera que va de Trubia pa contra Proaza, asítiase ún de los llugares más interesantes pa l'arqueoloxía del paleolíticu asturianu. L'afayu na Cueva'l Fornu, nel conceyu de Santu Adrianu, de grabaos prehistóricos que s'anunció ayeri dende la Conseyería de Cultura, abre un nuevu campu de conocimientu pa esta etapa de la historia d'Asturies.

L'antropólogu Juan Luis Arsuaga y l'arqueóloga Gema Adán foron los espertos que llevaron alantre'l trabayu encargáu pola Conseyería de Cultura na Cueva'l Fornu, en Santu Adrianu, pa conocer meyor los restos que se guarden nesta cueva y la so contornada, que resultó tener bayura de grabaos prehistóricos. Los responsables de la escavación apuntaron que los grabaos pertenecen al Paleolíticu Superior y que la representación ígüenla amueses d'arte figurativu y tamién abstractu. La datación aproximada de los afayos asítiase nuna banda ente los 30.000 y 40.000 años d'antigüedá, y amás de los grabaos, los arqueólogos alcontraron bayura de restos materiales, incluyendo más de 1.000 pieces de güesu y otros 6.000 pertenecientes a preseos de piedra. En cualquier casu, paez claro que'l llugar habitábenlu neanderthales que practicaben la caza nos valles del Trubia nel tiempu del musteriense y del auriñaciense.