Adrían Barbón secretariu xeneral nuevu de la FSA

|
By Parizska (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons

Impúsose nes eleiciones primaries a la secretaría xeneral de la FSA-PSOE a José María Pérez.

Adrián Barbón llogró 3.315 votos (60,58%) frente a los 2.072 votos (37,87%) de José María Pérez, n'unes votaciones nes que participaron 5.472 afiliaos socialistes.

Dempués de conocese los resultaos, Barbón quiso destacar que ye la primera vegada na historia na que la FSA-PSOE escueye al so secretariu xeneral col votu directu de los militantes. Amás quixo agradecer la felicitación del secretariu xeneral del PSOE, Pedro Sánchez, y de Javier Fernández, que foi a la sede a saludar a los candidatos. En referencia a les relaciones con Fernández y el so gobiernu dixo que "como secretariu xeneral, el presidente sabe que va tener tola mio collaboración al frente del partíu por que cumplamos el nuesu programa electoral".

Nes so pallabres tamién alvirtió de la necesidá de "dirixinos a la sociedá, porque nun somos abondos" y porque "precisamos atraer a quien tuvieron nesta organización y colaron". Tres declarar que la FSA-PSOE "ye'l partíu d'Asturies", el secretariu xeneral electu afitóse como oxetivu a llograr que la FSA "va sumase a la vanguardia del cambéu para faer realidá lo que nos tán pidiendo los ciudadanos".

Pa finar la so intervención, en presencia de la vicesecretaria xeneral del PSOE, Adriana Lastra, Barbón recalcó un de los mensaxes centrales de la so campaña a les primaries: "O cambiamos o cambiennos". L'actu cerrose cantando La Internacional.
 

Semeya: Adrián Barbón na presentación de la so Candidatura a la Secretaría Xeneral de la FSA, el 06/07/17, na Casa del Pueblu de Xixón. (By Parizska (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons)

Contador Estadistiques