AACOMASI denuncia’l mal añu que vien pa la mazana

Lo que tenía de ser un añu de collecha grande de mazana, como correspuende siempre colos años impares, lleva tola traza de convertise nun añu bien probetayu.
L'Asociación de Collecheros de Mazana de Sidra (ACOMASI) qu'axunta a más de 220 socios, peritó nun 30% la perda sobre la collecha de mazana prevista p'anguaño por culpa de la falta d'agua que careció Asturies esti branu, una mengua na collecha pola que los mayores afectaos van ser los titulares de les pumaraes, según remembró'l presidente de l'asociación Jorge García, en cuantes que los llagareros nun tienen mayor problema en mercar mazana de cualquier otru puntu del continente , sobremanera Francia y países de la Europa del este a precios muncho más baratos.


Un añu impar normal suel dar una collecha de 40.000 tonelaes nel conxuntu d'Asturies, una cifra que ye la mitada de lo que se producía nos años 60, momentu en qu'entamó la crisis de les pumaraes clásiques asociaes al aprovechamientu de la pación que dexaron de renovase y de cuidase progresivamente. En añu par la producción baxa normalmente de la raya de les 10.000 tonelaes. Con too y con ello, les previsiones apunten a que d'equí a la vuelta de cuatro - cinco años la producción de mazana asturiana va xubir esponencialmente cola entrada en serviciu de les pumaraes nueves que se crearon de va poco p'acá y ente les que rescamplen les de la familia Masaveu en Sariegu, con más de 40 hectárees yá plantaes o les de Sidra Trabanco, que dispón d'estensiones asemeyaes ente Siero, Llangréu y Mieres. N'entrando en producción solo estes finques puen producir cerca de 1.200 tonelaes.