A Caridá acueye les III Sesióis d’Estudio del Occidente de l’ALLA

El vienres y el sábadu, el salón de sesióis del Conceyo del Franco, n’A Caridá, acueye la tercer edición de les Sesióis d’Estudio del Occidente. L’Academia de la Llingua Asturiana (ALLA) entama esta actividá dedicada a la fala del Eo-Navia.

José A. Fernández Vior va encargase d’abrir les xornaes tres un actu presentación, previstu pa mañana les 17.30 hores, cola charra ‘A composición como mecanismo expresivo’. Darréu, Ángel Fernández va falar de ‘Molíos y outros inxenios hidráulicos no Conceyo del Franco’; Ricardo Saavedra Fernández-Combarro, de ‘A lliteratura na música grabada en eonaviego’; y Xosé Antón González Riaño, del ‘Uso y escolarización da fala: El que pensan os alumnos’. Pa zarrar esti primer día, Rafael Cascudo, Enrique Alonso, Belén García, José Pasarón y Xabiel González van participar nuna mesa redonda entitulada ‘Normalización socioeducativa da fala eonaviega’. El moderador va ser Iván Iglesias ‘Cazarón’.

L’actividá’l sábadu va principiar a les 10.30 hores cola conferencia de Xosé Lluis García Arias ‘Testos medievales de la Tierra d’Entrambasaguas’, a la que va siguir ‘Intertextualidá y interdiscursividá na poesía última na llingua del Eo-Navia’, de María José Fraga, y ‘Sistemas de Información Xeográfica y ‘Continuum’ Llingüístico: úa proposta metodolóxica’, de Benxamín Méndez. Tres una pausa, la mañana va finar con ‘A identidá eonaviega a través da súa lliteratura”, de Ruth González Rodríguez, y una mesa redonda moderada por Marisa López Diz y entitulada ‘Lliteratura y llingua’, na que van falar Arturo Álvarez ‘Tangueiro’, María José Fraga Suárez, Miguel Rodríguez Monteavaro y Belén Rico Prieto. Tres la mesma, va facese una visita guiada al taller d’Herminio Álvarez.

Yá pela tarde, a partir de les 17 hores, Ágata García Castro va ufrir la charra ‘A fala na rede: as TIC como ferramentas de normalización’, pa depués continuar con ‘Úa ouyuada á poesía contemporánea en eonaviego’, de Pablo Texón, y ‘Achegamento á situación actual da Lliteratura Infantil en Gallego-asturiano’, d’Aurora Bermúdez Nava. Les dos actividaes caberes van ser una mesa redonda moderada por Ruth González Rodríguez, de títulu ‘A música na fala’, na que van participar Ángel Berdiales, Andrés Rodríguez Monteavaro, Marisa López Diz y Xosé Fernández ‘Ambas’, y una actuación de Mestura. La entrada pa les III Sesióis d’Estudio qu’entama l'ALLA al traviés de la Secretaría Llingüística del Navia-Eo ye llibre.