988.038 asturianos van poder votar nes Nacionales de mayu

El 24 de mayu va haber eleiciones a la Xunta Xeneral, pa les que tienen derechu a votu un total de 988.038 asturianos y asturianes. D'ellos, 106.541 residen fuera del Estáu.

L'aumentu de la emigración por mor de la situación que vive'l país fai qu'esta cifra medrara en 22.316 persones con respeuto a la cita de 2011 y en 16.721cola del 2012, según los datos qu'ufrió güei Guillermo Martínez, conseyeru de Presidencia. Arxentina continúa siendo'l país con más asturianos rexistaos nel Censu Eleutoral de Residentes Ausentes (28.598), siguíu por México (17.125) y Cuba (12.867).

El númberu de persones total con derechu a votu tamién medra: 1.015 con respeuto a 2011 y 1.722, con 2012. Sobre'l calendariu eleutoral, Martínez apuntó'l que'l día 22 d'abril van espublizase les candidatures nel BOPA y que'l plazu pa solicitar el votu per corréu fina'l 14 de mayu. Nel casu de los residentes fuera del Estáu, tienen hasta'l 25 d'abril pa demandar la posibilidá de votar, derechu que van poder exercer per vía telemática a diferencia d'otros años, que namái se podía facer per corréu postal y fax. Mentes, la campaña eleutoral va allargase del 8 al 22 de mayu. Tola información de les Nacionales va poder consultase nesta web, na que la llingua asturiana nun tien presencia.