4.000 persones visitaron la esposición ‘Voces’, que s’amplía hasta’l 23 d’avientu

‘Voces. La llingua n’Asturies al traviés de los sieglos’ ta siendo un ésitu de públicu, como amuesen los 4.000 visitantes que rexistró la esposición del Muséu Arqueolóxicu d'Asturies en menos de mes y mediu. L’amuesa amplíase otra vuelta, agora hasta’l 23 d’avientu, cola idea de que darréu viaxe per dellos conceyos del país.

La Conseyería d’Educación y Cultura anuncia qu’esta asistencia y l’interés de munchos centros educativos en conocela lleva a una ampliación nueva d’una esposición qu’abrió les sos puertes el 26 de setiembre con fecha llende afitada pal 14 d’ochobre, que llueu s’estendió hasta’l domingu pasáu. Navidá, en concreto hasta’l 23 d’avientu, ye’l plazu nuevu pa poder percorrer “la historia social y cultural d’Asturies dende la perspeutiva de la llingua”, como esplicó’l so coordinador, Xulio Viejo, a Asturies.com.

Tamién s’entamaron dos visites guiaes, el 6 y el 13 d’ochobre, que se repiten agora la mañana de los sábados 24 de payares y 1 y 15 d’avientu. Éstes son de baldre, anque ye necesario acutar plaza al traviés del númberu de teléfonu 985106741 o del corréu electrónicu splnormalizacion@asturias.org.

La rellación del asturianu coles llingües indoeuropees y romániques, l’apaición de los primeros documentos nos que se menta l’asturianu como llingua oral tradicional y propia de la xente d’esti territoriu, los primeros documentos n’asturianu, el desenvolvimientu de la so lliteratura, la minorización o los movimientos sociales pa la so recuperación y revitalización tienen acoyida nos materiales d’esta esposición, onde s’otorgó gran importancia a los elementos gráficos y audiovisuales. Na esposición pueden contemplase, amás, delles pieces lliteraries y arqueolóxiques singulares, cedíes por coleucionistes y pol mesmu Muséu Arqueolóxicu d’Asturies, que se pue visitar de baldre los miércoles, xueves  y vienres, de 9.30 a 20 hores; los sábados, de 9.30 a 14 y de 17 a 20 hores; y los domingos, de 9.30 a 15 hores.