24 estudiantes van participar na Escuela de Branu d'Asturianía

Nel mes de xunetu procedentes de cases y centros asturianos de tol mundu.

Arxentina, con once representantes, ye'l país que más alumnos aporta, siguíu de México, con trés. Tamién van tener representación Chile (2), Cuba (2) y Venezuela (1), a los qu'hai que sumar cinco estudiantes del restu del Estáu. Toos ellos van formase en música y cultura tradicional pa que, una vegada de vuelta, tresmitan dichos conocimientos nes coleutividaes asturianes del so llugar de residencia.

Cada promoción recibe 300 horas llectivas, distribuyíes en trés cursos o niveles, que se faen n'Asturies en xunetu. Esti añu va desendolcase n'Uviéu ente'l 13 y el 28 de xunetu, en concreto nel Institutu Asturianu d'Alministración Pública Adolfo Posada, onde los estudiantes van recibir clases de percusión, cultura y llingua asturiana, sociedá y polítiques sociales venceyaes cola emigración. Amás, ta prevista una visita al occidente del país.

Dende'l 2002 hasta la fecha pasaron pela Escuela de Branu d'Asturianía 122 alumnos (74 muyeres y 48 homes) procedentes de 39 centros y cases d'Asturies de doce países d'América y Europa, selleicionaos nes modalidaes de gaita (60) y baille (62). Los d'esti añu correspuenden al segundu cursu de la quinta promoción.