18 años de la catástrofe de Chernobil

La nueche del 25 al 26 d'abril de 1986, a la 1 y 23 de la madrugada del sábadu, el reactor númberu cuatro de la central nuclear de Chernobil (Ucrania) sufrió l'accidente más grave de la historia nuna instalación d'esti tipu. Dieciocho años dempués, los efectos de la radiactividá nun abocanen. Más de 30.000 persones muertes y sobre 7 millones de persones contaminaes d'una manera o d'otra pola radiación son el parte de daños humanos del accidente, un parte provisional en cuantes que la Organización Mundial de la Salú diz que la previsión que tienen d'equí a dientro d'unos años ye que les muertes s'alleguen al mediu millón.

La catástrofe de Chernobil dañó enforma a Bielorrusia, Ucrania y Rusia, causando-yos perdes incalculables, y dañando un área de más de 160.000 km2. Cerca de venti años dempués del accidente, entovía queden espardíos pelos países de l'antigua URSS dellos reactores del mesmu modelu, el RBMK-1.000, que nun se lleguen a pesllar por razones económiques, y na mesma Chernobil entovía siguen prendíos otros dos reactores.

L'accidente socedió al facer una preba de seguridá col reactor. Los técnicos de Chernobil queríen demostrar que l'alternador podía siguir funcionando en dellos momentos ensin que se-y apurriere vapor pola inercia de la turbina y asina poder tener siempre en funcionamientu los sistemes de refrixeración de la central anque nun hubiere tampoco xeneradores d'emerxencia. La preba salió mal al nun poder recuperar a tiempu'l reactor, colo que la potencia baxó hasta 30 mw. Darréu d'ello, el reactor recalentó hasta españar.

La fuercia del españíu foi abondo como pa valtar la tapa del reactor, una llábana de cementu de dos tonelaes, colo que yá nun hebo pilancu nengún pal escape de radiación. Entovía más, al entrar aire pela tapa, el grafitu del reactor quemó más rápido. Nueve díes foron precisos p'apagar el fueu, y ello nun foi con agua precisamente. 5.000 tonelaes de plomu, boru y otros materiales tuvieron de vertese sobre'l reactor, que s'enterró dempués nuna gran caxa de 410.000 metros cúbicos d'hormigón. Actualmente ta poniéndose una segunda caxa de cementu pa tapar les resquiebres de la primera. 100.000 años van facer falta pa que la radiactividá desapaeza.

La URSS nun avisó de la gravedá de la contaminación, y foi la central sueca de Forsmark, la que dio parte'l llunes 28 d'abril, dos díes dempués del accidente, de que los contadores d'ellos marcaben valores14 vegaes penriba de lo normal. Cuando-yos entrugaron a les autoridaes soviétiques, Moscú dio-yos llargues, pero doce hores dempués el Conseyu de Ministros de la URSS reconocía l'accidente de Chernobil nun comunicáu oficial. La falta de conocimientu y d'actuaciones d'urxencia nes primeres hores del accidente infló mas la cantidá de muertos. Pa facese una idega de la gravedá del socesu, valga con dicir que nel accidente de Three Mile Island (USA) soltáronse 17 curios, y en Chernobil el gobiernu soviéticu declaró un escape de 50 megacurios, 200 vegaes más que les bombes d'Hiroshima y Nagasaki.

A la fin hubo d'evacuase a tola población nun radiu de 30 kilómetros, y entovía güei hai 375.000 persones que tan desplazaes fuera de la zona "d'esclusión" onde namás s'atreven a vivir 556 persones, mui vieyes les más d'elles. La contaminación radiactiva dexó erma pa l'agricultura una superficie del tamañu d'Asturies, mientres que los efectos pa la salú humana perpasen el maxín de cualquier previsor: Hai un 300% más de casos cáncanu de tiroides y tolos demás males rellacionaos con esta glándula qu'en cualquier otru llugar del mundu, mientres que la leucemia ataca sobremanera a les más de 8.000 persones que trabayaron pa construir la caxa d'hormigón que tapa'l reactor. La mortalidá xeneral ye un 30% más alta, y amás detectáronse casos en que la radiación afectó a la cadena xenética, cosa que nun se dio nin coles bombes de la Segunda Guerra Mundial

L'agua del ríu Pripiat, afluyente del Dnieper esporta tamién esta radiación hasta'l Mar Prietu, prohibiendo la pesca nun área bien grande por culpa de la contaminación presente nos pexes. Otramiente, 9 millones de persones reciben pel cañu de les sos cases esti agua contaminao.


Pa conocer más sobre'l desastre de Chernobil pues consultar esta web, anque un dexa de resultar apavoriante esta páxina personal coles semeyes que saca una moza que pega paseos en moto pela "Zona d'esclusión"