“Un ataque grave a la viabilidá de los medios n’asturianu”

La XDLA critica’l recorte nuevu a les ayudes a empreses informatives pa la normalización del idioma. Les perres destinaes menguaron un 81 por cientu con respeuto a les cifres del 2010.

La quita de 47.000 euros, tres pasar de 127.000 a 80.000, nes subvenciones pa medios de comunicación ye pa la Xunta pola Defensa de la Llingua Asturiana (XDLA) “un ataque grave a la viabilidá de los proyectos informativos n'asturianu y un intentu claru d'acabar, añu tres añu y pasín a pasu, col presupuestu que la Dirección Xeneral de Política Llingüística dedica a les ayudes a los medios de comunicación, un sector que ta siendo de los más castigaos pola crisis económica”. La mengua, que pa esti 2015 ye del 37 por cientu –del 52, 98 por cientu en comparanza con hai dos años–, llega al 81 por cientu si miramos les cifres del 2010.

La organización cívica entiende que “los fechos son tovía más graves si tenemos en cuenta que los medios de comunicación son fundamentales pa que l'idioma propiu d'Asturies algame'l rangu social de normalidá” y recuerda que la Llei d’Usu y Promoción del Bable/Asturianu obliga al Gobiernu a ayudar a los medios qu’empleguen l’asturianu y gallego-asturiano. “Sicasí, l'Executivu paez actuar pa impedir l'afitamientu del asturianu nos mass media, la sostenibilidá d'estos medios, la so independencia económica y la so llibertá de prensa”, añaden.

Tampoco nun ta d’alcuerdu la XDLA cola forma d’espublizar la convocatoria de subvenciones, “a metá d'añu y con quince díes hábiles pa presentar la documentación”, lo que fai “que dalgunos medios esperen a que se conceda la subvención pa facer el proyectu, colo que namás apaecen conteníos n'asturianu dos o tres meses a final d'añu”. “Esta situación pon mui dificíl la viabilidá y continuidá de cualquier proyectu nesti 2015”, añade.

Otra manera, “ye de reseñar qu'añu tres añu, el Gobiernu castiga a los medios de comunicación n'asturianu nun poniendo nellos publicidá institucional, colo que s'imposibilitá'l nacimientu de cualquier ufierta nueva que quiera tener l'asturianu como llingua vehicular y con unos recursos económicos dignos pa los profesionales”, apunta la XDLA.

Tres l’alcuerdu de la FSA-PSOE y IX

Nun escaez la organización cívica que la espublización nel BOPA de les ayudes a medios de comunicación vien tres la escoyeta de Javier Fernández como presidente del país tres llegar a un alcuerdu con Izquierda Xunida (IX), nel que la oficialidá quedó guardada nun caxón. “Ún de los principales alcuerdos en materia de política llingüística ye que se va ameyorar la presencia del asturianu nos medios de comunicación. Sicasí, hores depués de la investidura de Javier Fernández, una de les primeres midíes que publica'l Gobiernu dexa bien claro cómo se mete la tisoria peles ayudes al asturianu”.

“Asturies y la so cultura necesiten medios de proximidá qu'ayuden a difundir y prestixar el so idioma, que visibilicen la so existencia y tola actividá cultural y económica que xeneren. Por eso, ye imprescindible la existencia de medios d'asturianu y tamién qu'esti idioma tea presente nos medios que mayoritariamente utilicen el castellanu. Ye imprescindible que los profesionales de la información que pueden y quieren utilizar esti idioma nun se vean condenaos a la precariedá. Ye dalgo fundamental nuna sociedá que s'autoproclama democrática como la nuestra”, sentencia la XDLA.