“Col megalitismu principió la primer colonización d’Asturies”, apuntó Villa na charra d'Ástura

|

L’arqueólogu Ángel Villa y el fotógrafu Juanjo Arrojo protagonizaron la charra mensual d’Ástura, de nome ‘Túmulos y dólmenes: un ampliu recorríu pola primer arquiteutura monumental del oeste de la península ibérica’. “Col megalitismu principió la primer colonización d’Asturies”, apuntó l'investigador del Muséu Arqueolóxicu d’Asturies.

El llocal social del Atenéu Obreru de Xixón quedó ayeri pequeñu pa esta charra conxunta dividida en dos partes. Na primera, Villa introduxo a los presentes nesta interesante etapa de la nuesa historia qu’estudiara nos sos primeros años d’investigación –agora centra los sos estudios nos castros, la Edá del Bronce y la primer romanización–, pa depués dar pasu a Arrojo, qu’amosó dalgunos exemplos d’estes primeres construcciones monumentales en Hueva, Badajoz y Asturies. “Esta forma de construyir, el megalitismu, prolongóse nuna etapa de tiempu mui llarga”, esplicó Villa, “comenzando nel V mileniu, hai agora 6.500-6.000 años antes de Cristo, y prolongándose hasta mediáu’l segundu mileniu”. Yera un tiempu de cambiu de réxime económicu nes poblaciones de la época, que pasaben de ser cazadores-recoleutores a prauticar l’agricultura y la ganadería. Nesti puntu nacen los túmulos, que funcionaben como tumbes y que servíen “de marcadores territoriales por parte d’una comunidá”.

El descubrimientu del carbonu 14 permitió que nel sieglu pasáu s’abandonaren les idees difusionistes venceyaes al megalitismu, que marcaben la esistencia de civilizaciones adelantaes al occidente européu nel Mediterraneu y afitó l’orixe occidental d’estes construcciones, en concreto na vertiente atlántica. Col megalitismu principió nel nuesu país “la primer colonización d’Asturies”, con treslladamientu de población dende la costa a les zones altes interiores. “Nun hai cordal nel que nun haya túmulos. Los caminos taben enllenos de tumbes visibles”, añadió’l tamién doctor n’Historia pola Universidá d’Uviéu. Col pasu de los años, estes construcciones foron evolucionando, “siendo poco a poco cada vegada más complexos”, esplicó Villa faciéndose ayudar de semeyes.

Darréu garró la pallabra Arrojo, que principió a amosar dólmenes de la provincia de Huelva, como el d’El Pozuelo, el de Los Gabrieles o’l de Soto, esplicando les sos carauterístiques y contando les dificultaes qu’atopó pa dar con dalgún d’ellos pola falta de señalización y el so asitiamientu en finques privaes. Llueu siguió con construcciones de Badajoz, como’l de Lácara, el de Carmonita, el de La Lapita, el de Monteperrino y el del Romo, dalgunos d’ellos afeutaos pol vandalismu, con pintaes o restos de fogueres nel so interior. Pa finar, punxo dalgunos exemplos asturianos, casu del área tumular del Monte Deva, los túmulos de Monte Areo, el dolmen de La Filadoira, el de Merillés, el de Pradias, la necrópolis tumular de Penouta, los túmulos de Canadeiro, el petrogliflo de La Xeronga o’l dolmen de Santa Cruz, ésti últimu asitiáu na capiella de mesmu nome en Cangues d’Onís.

Na semeya, Villa y Arrojo.

Contador Estadistiques