La charra mensual d’Ástura nel Atenéu Obreru de Xixón va centrase nes primeres construcciones monumentales nel oeste de la penísula

‘Túmulos y dólmenes: un ampliu recorríu pola primer arquiteutura monumental del oeste de la península ibérica’ ye’l nome de la conferencia mensual d’Ástura, que va celebrase esti martes nel Atenéu Obreru de Xixón. L’arqueólogu Ángel Villa va afondar nesta temática, pa lo que se va sirvir de semeyes de dellos conxuntos megalíticos feches por Juanjo Arrojo.

En concreto, el tamién Doctor n’Historia pola Universidá d’Uviéu va esponer “un fechu común a bona parte de les sociedaes europees de magar entamó'l V mileniu: la construcción d'enterramientos más o menos monumentales, o lo que ye lo mesmo, la primer arquiteutura monumental del continente col envís de caltenese nel tiempu encamentando de mou maxestuosu l'alcordanza de los antepasaos”. Gracies a les semeyes d’Arrojo, los presentes van poder conocer exemplos de conxuntos megalíticos d'Asturies, Extremadura y Andalucía y los ñidios fluxos culturales calteníos a lo llargo la Prehistoria recién, atalantando que “mensaxes d'estremáu calter trescienden lo funerario y situaciones sociales ya ecolóxiques mui diferentes tapécense na so construcción”. Según apunten dende Ástura, “güei los dólmenes ibéricos nun amuesen duldes sobro'l so calter autóctonu y la so antigüedá –nel sen de nun ser frutu d'un difusionismu cultural mediterraneu ‘más avanzáu’–, amás de conocese la so gran diversidá formal y la so rellación con otros llugares neolíticos monumentales, cromlechs y menhires”.

Al igual que’l mes pasáu, la charra retrásase en 30 minutos con respeuto al horariu habitual. Asina, a les 20 hores ye cuando Villa, anguaño arqueólogu del Muséu Arqueolóxicu d’Asturies tres quince años na Direición Xeneral de Patrimoniu Cultural de la Conseyería d'Educación, Cultura y Deporte, onde dirixera'l Plan Arqueolóxicu del Navia-Eo, va principiar esta conferencia apoyada nes semeyes d’Arrojo, fotógrafu especializáu en temes rellacionaos col país: paisaxe, arte, tradiciones, vezos, monumentos, patrimoniu, etnografía, botánica, etc.