¿Quies deprender o ameyorar el to asturianu? Agora ye'l momentu

Son dellos los cursos de llingua asturiana o gallego-asturiano que s’entamen n’Asturies esta seronda. Ufrímoste los que tienen anguaño la matrícula abierta y que pues dar en diecisiete conceyos del país y, inclusive, a distancia.

Empezando pel occidente, hasta’l miércoles tovía ye posible apuntase al VII Curso de Lingua e Cultura del Navia-Eo, que va desendolcase en Grandas. Esti cursu forma parte del Plan d’Actuacióis da Oficina Cultural e Lingüística del Parque Histórico del Navia en Materia de Normalización Social del Galego-asturiano prá Anualidá de 2015, baxo la tutela da Dirección Xeneral de Política Lingüística del Principao d’Asturias, y cuenta cola collaboración de l’Academia de la Llingua Asturiana.

En total consta de 42 hores llectives dividíes en 14 sesiones que se van celebrar los martes y xueves ente’l 13 d’ochobre y el 26 de payares. Los alumnos van poder recibir delles materies impartíes por espertos de la zona, como la “iniciación á gramática del galego-asturiano; a sociolingüística y a literatura del galego-asturiano; os oficios tradicionales; as esperencias docentes col galego-asturiano; os paisaxes postindustriales no Navia-Eo; recursos naturales d’Entrambasauguas y, pr’acabar, a música tradicional no Navia-Eo”. El preciu de la matrícula ye de 28 euros y el formulariu d’inscripción pue descargase nesti enllaz.

En Cabranes

El Serviciu de Normalización Llingüística ‘Comarca de la Sidra’ entama un cursín d’asturianu de baldre en Santolaya, con fecha d’aniciu’l 5 d’ochobre y final previstu pal 14 d’avientu pa sumar un total de 30 hores llectives. Les clases van tener llugar los llunes y miércoles, de 17.30 a 19 hores, y los conteníos son los siguientes: Historia y Socioloxía de la Llingua Asturiana; Normes Ortográfiques, Léxicu, Sintáxis y Morfoloxía; y Música, Lliteratura y Cine en Llingua Asturiana.

Los interesaos pueden apuntase hasta'l propiu 5 d'ochobre contautando col Serviciu de Normalización Llingüística ‘Comarca de la Sidra’ nel teléfonu 985.71.84.13 –n’horariu de 9 a 15 hores, de llunes a xueves–, al traviés del corréu electrónicu llinguachigre@gmail.com o de la paxina de Facebook del SNL.

En Gozón

La Xunta pola Defensa de la Llingua Asturiana –entidá acreditada pola Conseyería d’Educación y Cultura pa la formación permanente del profesoráu– pon un cursu d’asturianu de nivel inicial en Gozón, que va tener continuidá con otru avanzáu en Carreño previstu pal mes de xineru. Xurde Fernández va encargase de dar les clases, que van desendolcase dende’l 13 d’ochobre na Casa La Escribana, asitiada na cai Suárez Inclán númberu 5 de Lluanco, los llunes y martes de 19 a 20.30 hores. El númberu total d’hores llectives ye de 30.

La matrícula va permanecer abierta hasta’l primer día de clase y tien un preciu de 20 euros, cantidá qu’inclúi tolos materiales necesarios. Los contautos p’apuntase o recibir más información son los siguientes: el teléfonu 679.650.998 o'l corréu electrónicu info@exunta.org.

Iniciativa pol Asturianu pon cursos en 14 conceyos

Nuna apuesta mui ambiciosa, Iniciativa pol Asturianu entama cursos d’asturianu de nivel 1 en 14 conceyos asturianos al empar, consciente de la importancia de formar a adultos nes llingües del país. Ún d’ellos va ser de gallego-asturiano, n’Ibias, mientres que’l restu van desendolcase en zones asturfalantes. Éstos tamién tienen la posibilidá de dase a distancia al traviés de la plataforma Moodle.

Amás d’Ibias, los conceyos onde se va poner clase son Avilés, Cangues d’Onís, Carreño, Ḷḷena, Llanera, Llangréu, Mieres, Parres, Ribeseya, Siero, Samartín del Rei Aurelio, Uviéu y Xixón. “La vocación d’esti programa de cursos ye la de tener continuidá nel tiempu y cuntar col escelente profesoráu formáu que collabora cola organización pa poner en marcha estos cursos, asina como con entidaes llocales que collaboren cola organización de los cursos”, espliquen dende Iniciativa pol Asturianu, qu’apunta qu’esti programa d'alfabetización tien el sofitu de l'Academia de la Llingua Asturiana, qu’otorga los diplomes acreitativos a la fin del cursu.

La matrícula pa los cursos va tar abierta hasta’l 16 d’ochobre y tien un preciu de 60 euros, de 50 pa los socios y collaboradores de la organización, cantidá qu’inclúi tolos materiales. En total compónense de 35 hores llectives. Pa formalizar la inscripción ye necesario rellenar esti formulariu.

Pa más información sobre los cursos pue contautase con Iniciativa pol Asturianu al traviés del corréu electrónicu contautu@iniciativapolasturianu.org o’l teléfonu 625.986.717, cola posibilidá de facer usu de les aplicaciones Telegram o WhatsApp. Los horarios de cada conceyu pueden consultase nel cartelu xubíu en documentos axuntos al final d’esta noticia.