Greenpeace diz que nun se fixo nada en xestión de residuos dende'l 2001

El Voceru de Greenpeace, Julio Barea, aseguró qu'en materia de reciclaxe y tratamientu de residuos el Principáu "nun fixo nada dende'l 2001 pa dir direutamente hacia una incineradora".

Al so xuiciu, foise en direición contraria a la que marquen les normatives y a la que se debería dir. Barea manifestábase asina en declaraciones a los medios enantes de dar entamu a la conferencia que pronunció na Universidá y que llevaba por títulu 'Por un modelu sostenible de tratamientu de los residuos'.
  
L'ecoloxista afirmó que n'España existen nesti momentu más de 100 conceyos que desarrollen una xestión de los residuos muncho más sostenible con midíes como'l recicláu puerta a puerta o'l sistema de tasa xusta -paga más el que más xenera-, lo que fai que más de 300.000 persones vivan yá con esti sistema y se llogren unos ratios de recuperación de residuos que superen hasta'l 80% de recuperación.
  
"Nun sabemos por qué n'Asturies nun s'apuesta por esti tipu de midíes, lo cual fadría absolutamente innecesaria la incineradora que se ta plantegando", dixo Barea, qu'indicó que la incineración nun fairía falta nin pa la fracción restu, porque la mesma sería d'un 15% nun principiu y baxaríen al 3% dempués.
  
L'ecoloxista afirmó que si s'aprobara esti mes la incineradora tardaría "bien de años" en quemar el primer camión de residuos, y probablemente acabaríase la vida útil del vertederu. Sicasí indicó que si s'apostara dende yá poles midíes y polítiques dirixíes a baxar los residuos "de xuru qu'en pocos meses podría falase de ratios de recuperación bien altos".
  
"D'un día pa otru pue subise la ratio de recuperación de residuos", dixo Barea, qu'afirmó que pa ellos fai falta "voluntá política". "Los políticos que tenemos hasta agora demostraron que nun saben xestionar los residuos y agora quieren imponenos la incineradora porque ye la solución más fácil pa los malos xestores", dixo.