L’asturianu nun esiste pal INE

|

La publicación de llibros n'Asturies aumentó un 7,04%, pasando de 1.121 títulos nel 2008 a 1.200 en 2009, según datos del INE, que nun fai referencia a la lliteratura n’asturianu.

El datu de libros editaos n’Asturies contrasta cola media estatal, que baxó un 13,7 por cientu nel 2009 respecto al añu anterior y rexistró la cifra más baxa d'exemplares publicaos de los últimos 10 años. Estos datos pertenecen a la Estadística de la Producción Editorial, correspondiente al añu 2009, dada a conocer pol Institutu Nacional d'Estadística (INE).

Asturies foi la séptima comunidá con menor publicación de títulos, per delantre de Canaries (861), Canaries (468), Castiella La Mancha (937), Estremadura (512), Murcia (523) y La Rioxa (237).
  
Los llibros de lliteratura fueron los más publicaos nun añu nel que'l 77,4 por cientu de los títulos editáronse en castellán. El 11,2 por cientu de títulos editáronse en catalán, valencianu y/o balear (8.379 títulos); el 2,5 por cientu, en gallegu (1.823); y el 1,4 por cientu, n'eusquera (1.027 títulos).
 
L’INE nun fai referencia a la llingua asturiana. Sicasí, la estadística si fai referencia a la lliteratura espublizada nel Estáu en ‘otros idiomes’, que representa’l 7,5 por cientu, especificando que’l 3,5 por cientu foi en dalgún idioma estranxeru, .
  
La cifra total estatal(74.521) engloba les primeres ediciones: 68.870 títulos (un 14,2 por cientu menos qu'en 2008); y les reediciones: 5.651 títulos (un 7,4 por cientu menos).
  
Si s'estrema ente llibros y folletos, el númberu de llibros editaos baxó un 14,1 por cientu, hasta 65.213 títulos, y los folletos rexistraron un descensu del 10,5 por cientu, asitiándose en 9.308 títulos.
  
La tirada media foi de 2.467 exemplares por títulu, lo que confirma l'enclín decreciente de los últimos años, con una reducción del 16,7 por cientu al respecto del 2008. El númberu d'exemplares editaos asítiase nel nivel más baxu de los diez últimos años, con 183,87 millones.
  
Nel 2009 reimprimiéronse 12.697 títulos, cifra que representa'l 14,6 por cientu de les publicaciones editaes n'España. Por categoríes de temes, más de la cuarta parte de los títulos editaos (el 28 por cientu) y casi la metá d'exemplares impresos (el 48,7 por cientu), correspondieron a la categoría Lliteratura.
  
 Los títulos dedicaos a Derechu, Alministración Pública, Previsión y Asistencia Social y Seguros representaron el 7,1 por cientu del total; los d'Historia y Biografía, el 5,9 por cientu; los de Ciencies Médiques y Sanidá, el 5,5 por cientu; y los de Ciencies Polítiques y Económiques y Artes Plástiques y Gráfiques y Fotografía, un 5,3 por cientu caún.
  
Cabe destacar dos temes d'especial interés, pese a representar una parte menor de la producción. Trátase de les publicaciones pa neños y los llibros de testu, que constituyeron el 3,2 por cientu y el 5,8 por cientu de los títulos publicaos, respectivamente. En cuanto al volume d'exemplares, estes categoríes representaron el 5 por cientu y el 12,5 por cientu.
  
Ente los llibros de testu, el 19 por cientu fueron de Ciencies Naturales; el 17,7 por cientu, de Filoloxía, Idiomes y Llingüística; y el 12,1 por cientu, de Matemátiques. Les publicaciones pa neños concentráronse en temes de Lliteratura (85,5 por cientu).
  
En cuanto al númberu de publicaciones oficiales, baxó un 19 por cientu respeuto al añu anterior. El mayor porcentaxe de títulos (11,8 por cientu) tuvo como temática les Artes Plástiques y Gráfiques, Fotografía.
 
Pal Ministeriu de Cultura'l sector editorial n'asturianu nun esiste

Contador Estadistiques