Pal Ministeriu de Cultura'l sector editorial n'asturianu nun esiste

El Ministeriu de Cultura destacó güei la xubida de les ventes de llibros nel Estáu y l'aumentu del ISBN nes llingües oficiales. L'asturianu nun ta contabilizáu al nun tener esi rangu llegal.

La subsecretaria del Ministeriu de Cultura, Mercedes Elvira del Palacio, faló de la continua xubida de les ventes nel sector editorial, a pesar de la crisis, con una facturación qu'algama los 3.000 millones d'euros n'España y 450 millones d'euros nel mercáu internacional. Sobre'l llibru dixital, Del Palacio anunció que nel 2009 facturáronse 45 millones d'euros.
 
Coles mesmes y mientres la Comisión de Cultura, celebrada güei nel Congresu de los Diputaos, Del Palacio sorrayó l'aumentu del ISBN (códigu de barres editorial) de llibros publicaos en llingües cooficiales. Asina en llibros en vascu prodúxose una subida del ISBN del 39%; en catalán del 12%; en gallegu del 25%; y en valencianu constatóse un aumentu del 10%.
  
Per otra parte y mientres la so intervención, sorrayó que'l sector editorial español ocupa'l tercer o cuartu puestu nel contestu internacional y apuntó que pal Gobiernu y el Ministeriu de Cultura l'apoyu al sector editorial ye una "prioridá".
  
Nesta mesma llínea, la subsecretaría de Cultura resaltó qu'España superó de sobra l'estándar fixáu pola UNESCO de 1,5 llibros por habitante, puesto que s'estima que nel 2010 la cifra de documentos por habitantes asítiase en 1,62.
  
Nesti contestu, Del Palacio recordó que'l 91% de los adolescentes confiesen lleer polo menos media hora diaria y anunció qu'España va ser convidada d'honor esti añu en delles feries internacionales rellacionaes cola edición de ciudaes como Nueva York y Turquía.
 
Asturies, tercer "provincia" con más llibreríes
 
Asturies ye la tercer "provincia" con más librerías por habitante d'España namás per detrás de les provincies gallegues d'A Coruña y Lugo, según un estudiu del 11811. En concreto, Asturies cuenta con una llibrería por cada 3.381 habitantes, mientres qu'A Coruña cuenta con una por cada 2.878 habitantes, siguida de Lugo, con 3.200 habitantes por llibrería.
  
L'estudiu, que tuvo en cuenta les provincies españoles con más de 100 llibreríes, analiza'l númberu, la distribución y llamaes a númberos d'información telefónica sobre establecimientos y grandes superficies de venta de llibros n'España, según informaron a Europa Press fontes de la empresa d'información.
  
Tres Asturies asítiense Gipúzcoa (3.513), Vizcaya (3.580), Valladolid (3.598), Pontevedra (3.950), Girona (4.225), Navarra (4.319) y Lleón (4.466).
  
Per otru llau, l'estudiu tamién confirma qu'a un mes de la comercialización del iPad d'Apple, que "podría revolucionar el sector", los llibreros españoles nun se muestren preocupaos, y amás, según otru trabayu de la Confederación Española de Gremios y Asociaciones de Libreros (Cegal), namás una de cada trés grandes llibreríes comercializa güei e-readers.
  
Concretamente, el 35% de les llibreríes grandes y el 20,5% de les grandes comercialicen los e-readers, frente a namás el 8% de les medianes grandes y el 5,1% de les medianes pequeñes.