La Diputación de Lleón quier que’l filandón seya Bien Cultural

El PP y la UPL sofitaron una moción del PSOE que pide a les Cortes que reconsideren la so actitú y entame los trámites pa declarar Bien d’Interés Cultural el filandón lleonés.

Foi a entamos de febreru cuando’l PSOE defendió nes Cortes de Valladolid, una proposición non de llei pa declarar el filandón como Bien d’Interés Cultural con caráuter inmaterial. Yera’l pasu previu p’avalar la so presentación como Patrimoniu Oral ya Inmaterial de la Humanidá pola Unesco. Pero a la fin el PP, con mayoría nel Parllamentu castellano-lleonés, refugó la proposición.
 
Agora, tolos partíos con representación na Diputación lleonesa, tamién el PP, secundaron la moción del PSOE, que tendrá de ser ratificada nel Plenu del próximu vienres día 26. Amás, la comisión de presidencia del Parllamentu castellano-lleonés va permitir una nueva oportunidá a la declaración de la tradición oral lleonesa como BIC, potestá que namás tienen los órganos llexislativos autonómicos.
 
Sicasí, ta por ver l’actitú del PP en Lleón va ser igual nes Cortes de Valladolid, onde en febreru los parllamentarios conservadores, tamién los lleoneses, votaron en contra del filandón. El PP acabó presentando una enmienda de sustitución que nun nomaba la declaración de BIC y  falaba d’afalar al executivu autonómicu pa que, col Ministeriu de Cultura y colos estudios afayadizos, el filandón algamara’l reconocimientu de Patrimoniu Oral ya Inmaterial de la Humanidá.
 
Pa los socialistes lleoneses, impulsores de la iniciativa, el filandón suma numberosos valores culturales y sociales y sirve pa la so tresmisión xeneracional, amás de tener otros valores como un sentimientu d'identidá propia, el respetu a la diversidá cultural y la la creatividá de la rexón lleonesa.
 
La unanimidá llograda na Diputación sigue a la consiguida nel Ayuntamientu de la capital lleonesa, que tamién alcordó col sofitu de los tres grupos una moción pa impulsar la reconocencia d'esta tradición oral dientro del Patrimoni Inmaterial de la Unesco.