El PP refuga la declaración de BIC pal filandón lleonés

El Grupu Socialista nes Cortes de Castiella y Lleón anunció que’l PP refugó que’l filandón lleonés fora declaráu Bien d’Interés Cultural inmaterial de la comunidá autónoma.

Al traviés d’una proposición non de llei, los socialistes queríen que la Xunta de Castiella y Lleón declarará’l filandón BIC, pero los populares refugaron la propuesta. El voceru de Cultura y Turismu del PSOE, José Ignacio Martín Benito, dixo que’l PP “da la espalda a les tradiciones orales del antiguu Reino de Lleón”.
 
Los socialistes queríen tamién, que’l Ministeriu de Cultura sofitara la candidatura del Conceyu de Lleón pa que’l filandón seya nomáu Patrimoniu Oral ya Inmaterial de la Humanidá pola Unesco, candidatura que previamente tendría que tener la declaración de BIC pa ser efeutiva.
 
Los socialistes afalaron al PP a reconsiderar la negativa, yá qu’en pallabres de Martín Benito, “nun ye lóxicu que’l filandón opte a patrimoniu mundial ensin ser reconocíu nel propiu territoriu”. Señaló tamién que nun entendía que la Xunta empobinara filandones dientro de la programación del 1.100 aniversariu del Reinu de Lleón, “mientres s’oponen nes Cortes a que s’abra un espediente pa la declaración de BIC”.
 
El PP presentó, según esplicaron los socialistes, una enmienda de sustitución que “escaecía” toa rellación con que la Xunta declarara’l filandón como BIC, falando d’afalar al executivu autonómicu pa que, col Ministeriu de Cultura y colos estudios afayadizos, el filandón algamara’l reconocimientu de Patrimoniu Oral ya Inmaterial de la Humanidá.
 
El Filandón, tradición espardida per Asturies, Lleón y parte de Galicia, consistía nuna xuntanza de muyeres de toles edaes que se xuntaben pa filar la llana o'l llinu. Sentábense nun local ampliu, enriba de tayueles cola rueca al cuellu y esmesaben la llana llevándola al fusu, al palu que garraben na otra mano, que voltiaben faciendo de la llana filos.
 
A los mozos permitíase-yos la entrada pa cortexar, pero con control y a la vista de les muyeres más adultes. Como en munches ocasiones venía la rápida intervención de los guardianes de la moral; párrocos, obispos y autoridaes civiles y eclesiástiques que publicaben bandos y sermones alvirtiendo de lo peligroses que yeren estes xuntances pa los mozos y les moces.