El Congresu aprueba regularizar emisores como Radio Sele

Los grupos del PSOE, PNV, ERC y IU-ICV sofitaron la moción de Nafarroa Bai qu’encamienta a les comunidaes autónomes a revisar les emisiones radiofóniques n’involuntaria irregularidá.

La propuesta, apautada por Nafarroa Bai y el grupu socialista, namás recibió'l votu contrariu d'UPN y UPyD, mientres que'l PP y CiU abstuviéronse. La iniciativa encamienta al Gobiernu central "a realizar les actuaciones que procedan nel marcu de les sos competencies sobre aquellos casos reconocíos por instancia xudicial d'emisores radiofóniques en situación involuntaria d'irregularidá".
 
Tamién pide a les comunidaes autónomes que revisen "aquellos casos reconocíos por instancia xudicial d'emisores radiofóniques d'ámbitu local que s'atopen en situación d’involuntaria d'irregularidá". Pa finar, encamienta al Gobiernu central a "impulsar los compromisos suscritos cola Carta Europea de Llingües Minoritaries no referío a los medios de comunicación".
 
Esta iniciativa, de llevase a cabu con toles de la llei, supondría una llicencia pa Radio Sele. La emisora, qu’entamó a emitir en 1986, algamó llicencia comercial en 1998 col gobiernu de Sergio Marqués. Sicasí, años más tarde, l’executivu de Vicente Álvarez Areces camudó les condiciones del concursu de llicencies con efeutu retroactivu, quedando la emisora uvieina ensin llicencia, recurriendo Radio Sele énte los tribunales.
 
En 2005, el xuez dio-yla razón a Radio Sele, declarando’l camudamientu del concursu como illegal y obligando a la devolución de la llicencia. Pero l’executivu nun cedió. La cadena n’asturianu recurrió nel Tribunal Supremu, pero ésti diz que les Comunidaes Autónomes son les que tienen competencies nel espaciu radiofónicu.
 
Esti asuntu de les competencies, foi precisamente’l que fixo que PP y CiU nun sofitaran la iniciativa de Nafarroa Bai por considerala una “inxerencia del Estáu nes competencies de les autonomíes”.
 
La propuesta de Nafarroa Bai, vien polos problemes pa emitir d’Euskalerria Irratia, la única radio qu'emite dafechu en vascu dende Pamplona, y que dende los años 90 ta presentándose a los concursos de frecuencies de la FM, refugando los socesivos gobiernos navarros concede-y llicencia. Anguaño, esisten dos sentencies del Tribunal Superior de Xusticia de Navarra qu’afirmen que los concursos onde nun se-y dio llicencia a Euslkalerria Irratia son illegales.
 
Dende’l PSOE, Juan Moscoso afirmó que'l so grupu quier que s'execute la sentencia, y amestó que si los socialistes tuvieren nel Gobiernu foral "nunca nun la recurrieren”. Amás, defendió la importancia de qu'esistan radios qu'emiten en vascu en Navarra.
 
Mientres que la diputada de NaBai sorrayó qu'Euskalerria Irratia "atópase en situación d'involuntaria irregularidá por deséu espresu y repetíu de l'autoridá competente, nesti casu del Gobiernu de Navarra". Nesti sentíu, Barkos señaló que "de l'arbitrariedá de la so actuación y la repetición d'esta actitú dan cuenta dos sentencies del TSXN qu'esixen que se revisen estes dos actuaciones".
 
¿Un reblagu pa Radio Sele?