¿Un reblagu pa Radio Sele?

El Congresu de los Diputaos va tratar güei una iniciativa de Nafarroa Bai na que se pide al Estáu que regularice les emisores en situaciones d’involuntaria irregularidá.

La coalición nacionalista quier qu’asina, dende’l Gobiernu central, regularicen les cadenes de radio, que como nel casu de Radio Sele, emiten ensin llicencia, “pero con casos reconocíos por instancia xudicial d’involuntaria irregularidá”. Recordar qu’en 2005 una sentencia del Tribunal Superior de Xusticia d’Asturies dio-y la razón a la emisora uvieina nel contenciosu que caltuvo cola alministración asturiana.
 
La moción de Nafarroa Bai vien por una interpelación de la diputada Uxúe Barkos al ministru d’Industria, Miguel Sebastián, por un casu perasemeyáu al de Radio Sele: Euskalerria Irratia, la única emisora qu’emite en vascu dende Pamplona y que según NaBai, sufre una campaña d’acosu del Gobiernu foral pa que dexe d’emitir.
 
Euskalerria Irratia ye la primer emisora qu’entamó a emitir en vascu en Navarra, nel añu 1988. Anguaño ye la única que lo fai dientro del cascu urbanu de Pamplona. Cuando nun tien programación propia coneuta con Euskadi Irratia, la radio en vascu del grupu EITB. La emisora recibió nel añu 1996 el premiu Larreko, un reconocimientu públicu a quien promueve y prestixa la llingua vasca. Amás, dende entamos d’esti nuevu sieglu tresmite los alcuentros del Osasuna.
 
La llicencia a esta emisora foi negada en delles ocasiones pol Gobiernu de Navarra, en manes casi siempre d’Unión del Pueblo Navarro, anque la primer vez que-y refugaron la llicencia foi en 1990, tando nel gobiernu’l PSOE.
 
En 1998, n’otra convocatoria de llicencies, volvió refugar la llicencia pa la radio en vascu, recurriendo ésta y afitando’l Tribunal Superior de Xusticia de Navarra que les concesiones nun foron llícites y que l’actuación fora irregular, yá que nun entamu Euskalerria Irratia algamara la máxima puntuación.
 
Ocho años depués, na siguiente convocatoria de llicencies, l’alministración autonómica volvió conceder frecuencia a les cadenes de la Universidá de Navarra y a Net-21, les mesmes qu’en 1998 foron consideraes illicites pola xusticia y que depués de 2006 volveríen ser consideraes asina, al nun cumplir les normes de la concesión.
 
L’últimu problema pa Euskalerria Irratia llegó en 2009, cuando’l Gobiernu foral obligo a cesar les sos emisiones, amás de les de les cadenes d’EITB (Radio Euskadi y Euskadi Irratia) y la de Radio María, yá que según Aeropuertos Españoles y Navegación Aérea (AENA) estes frecuencies, qu’emitíen dende’l monte d’Erreniega, producíen interferencies nel aeropuertu de Pamplona.
 
De llegar a producise la solicitú del Gobiernu de Navarra, anguaño nun esistiría nenguna emisora en vascu na fastera de Pamplona. Sicasí, almitióse’l treslláu a otra centru emisor de la frecuencia d’EITB y depués d’Euskalerria Irratia, tres demostrar ésta que nun yera la causante de les interferencies.
 
Dende Nafarroa Bai quieren que’l Gobiernu español interfiera pa que la cadena en vascu, que lleva 22 años emitiendo (Radio Sele lleva 24), consiga a la fin tener llicencia. Amás, na moción, Uxúe Barkos insta al executivu de Zapatero a treslladar al Gobiernu navarru los compromisos de la Carta Europea de Llingües minoritaries, qu’afitaba que dende la comunidá foral nun cumple los compromisos referíos a medios de comunicación.
 
Radio Sele, lo que nun pudo ser