Radio Sele, lo que nun pudo ser

Depués de que Xuanxo Mariño diera por peslláu l’asuntu de la llicencia, facemos un repás pela historia de Radio Sele, too un símbolu del movimientu de vindicación llingüística.

La emisora, qu’entamó a emitir en 1986, algamó llicencia comercial en 1998 col gobiernu de Sergio Marqués. Sicasí, años más tarde, l’executivu de Vicente Álvarez Areces camudó les condiciones del concursu de llicencies con efeutu retroactivu, quedando la emisora uvieina ensin llicencia, recurriendo Radio Sele énte los tribunales.
 
Xuanxo Mariño recuerda la época con inquietú, “foron diez años difíciles nos que llegué inclús a non querer falar del tema porque'l fechu de pensar nello poníame bastante nerviosu”.
 
En 2005, el xuez dio-yla razón a Radio Sele, declarando’l camudamientu del concursu como illegal y obligando a la devolución de la llicencia pa Radio Sele. Pero l’executivu nun cedió. La cadena n’asturianu recurrió nel Tribunal Supremu, pero esti diz que les Comunidaes Autónomes tien drechu de “facer y desfacer coles llicencies lo que quieran”, según Mariño.
 
Poro, dende Radio Sele yá dan por perdida la llicencia comercial, colo que diben poder llegar a más xente, profesionalizase y consiguir beneficios publicitarios. Anguaño, tán sollertes sobre los cambios que va trayer pal sector la llei del audiovisual, que nel casu de les radios comunitaries llindará’l presupuestu a 50.000 euros añales y prohibirá cualesquier forma de publicidá. Con tolo que traiga la nueva llei, según indica Mariño, la radio siguirá, “como siempre la persona que tenga algo que comunicar, eso si n’asturianu, equí tien un micrófonu”.
 
Mariño recuerda que la persona encargada de quita-yos la llicencia foi Javier del Olmo, daquella xefe de telecomunicaciones de Principáu, ex Conseyeru d’Industria de Cantabria y que ta acabantes de ser condenáu a ocho años d'inhabilitación pa cargu públicu  y dos años y ocho meses de cárcel por delitos de prevaricación y obstrucción a la xusticia cometíos mientres yera presidente del Puertu de Santander, “si nun fuera por esta persona probablemente nun pasaría nada y nun se tendría perdíu una oportunidá histórica yá que ye perdificil tener un mediu de comunicación n’Asturies”, camienta.

Fala de lo que teníen pensáu daquella pa la emisora, con una programación dafechu n’asturianu de 24 hores, “como cualesquier emisora convencional, pero na nuesa llingua”, y el sofitu a los músicos d’Asturies. Tamién señala que como radio comercial diben siguir dando la pallabra a la xente, “siempre tuvimos claro, qu'esos temes que son tabú pa los otros medios, equí tendríen un micrófonu”.
 
Xuanxo Mariño recuerda la importancia de tener una emisora comercial n’asturianu, “mientres qu’agora facemos lo que podemos”. Sicasí, fala de programes que tuvieron perbona acoyida ente l’audiencia, como retresmisiones deportives, les que se faen desde Lorient o la que se fixo en direuto desde Frisia del festival Liet Lavlut 2009.
 
Sobre’l futuru, pendientes de la llei del audiovisual, recuerda que n’abril de 2009 camudaron de local, con nuevos estudios y otra ubicación del centru emisor. Amás, como paez ser un vezu na emisora, superando trabes; “prohibiéronnos usar l’enllaz que vía radio usen les demás emisores, poro, tuvimos que buscar otru sistema d’emisión y tuvimos estos meses con una programación musical, a partir d'agora ya entamará la programación en direuto. Fueron nueve meses pa poner esto n’orde.
 
Xuanxo Mariño; “Si tenemos que parar siguiremos per internet”
Claros y escuros pa la llingua nes ondes