El Bloque tacha de "cerril ya inorante" la postura de Chelo Vega

|

Bloque por Asturies tachó de "cerril, acomplexada ya inorante" la postura de Consuelo Vega. Mientres que dende Xuventú Asturianista acusen al PSOE de "pisotiar" la Llei d'Usu.

El Voceru del Bloque, Pablo Fernández, refirióse a les declaraciones que la responsable autonómica fixo ayeri nel programa 'Asturias hoy' de la Radio del Principáu (RPA). Les mesmes referíense al reciente autu del Tribunal Constitucional qu'avalaba la constitucionalidá de la Llei de Promoción y Usu del Asturianu. Vega caltenía que la mayor parte de la población ve bien que s'use l'asturianu pero refuga les "imposiciones".  
  
"Usar el términu imposición pa falar del asturianu sólo demuestra que detrás de toa esta engarradiella hai un pensamientu cerril, acomplexáu y inorante que lo único que busca ye distorsionar l'usu llibre de la llingua asturiana", señaló Fernández. Al so xuiciu, n'Asturies nun se respeten los drechos llingüísticos, y "l'exerciciu de cualquier drechu siempre va apareyáu d'un exerciciu de responsabilidá per parte de l'Alministración que garantice l'usu d'estos drechos, nesti casu del asturianu".
  
Según Fernández, "Asturies nun pue ser un país modernu y cultu mientres existan políticos que tean en contra de la oficialidá"."Nun pue ser un país modernu, porque la falta d'oficialidá ye un déficit democráticu flagrante y nun pue ser un país cultu", añadió, "porque l'asturianu como llingua supón la máxima espresión de la cultura y la identidá asturianes, y polo tanto poné-y torgues supón condenalu a la muerte paulatina".
  
"Llamentamos les declaraciones de Consuelo Vega, llamentamos que se posicione nel ámbitu d'aquellos políticos que pretenden distorsionar la nuestra llingua, y pidimos que reflexone sobre les sos declaraciones y les responsabilidaes del so cargu", acabó Fernández.
 
Xuventú Asturianista diz que’l PSOE “pisotió” la Llei d’Usu
 
Les mocedaes del PAS celebren que’l Tribunal Constitucional decidiera refrendar la Llei d’Usu. La organización cree que ye un avance depués de munchos años de reivindicación llingüística y qu’esto ocurre dellos años depués de l’aprobación la única base llegal de la llingua asturiana, que recuerden “consiguióse gracies al alcuerdu del PAS col entós presidente d’Asturies, Sergio Marqués”.
 
Xuventú Asturianista diz nun entender les declaraciones de la Conseyera d’Alministraciones Públiques, Ana Rosa Migoya, nes qu’afitaba que l’Alministración siempres almitió escritos n’asturianu, cuando “hai que recordar qu’esta Llei foi pisotiada de contino pol PSOE y ninguneada por IU” y que los gobiernos d’estes formaciones “lleven 12 años ensin da-y desarrollu normativu, que permita la so aplicación”.
 
“Nun entendemos qu’una persona asina, miembru del PSOE y del Gobiernu, tan hostil al reconocimientu de los drechos llingüísticos de los asturianos, tenga mieu a dicir la verdá, yá que tovía va un par de meses un ciudadanu foi humildáu por usar l’asturianu énte l’Alministración”, apunten.  
 
Dende Xuventú Asturianista feliciten al ciudadanu afeutáu pol incumplimientu de Llei d’Usu, “porque’l Constitucional dio-y la razón, y esperamos que sirva esta decisión p’algamar l’estatus xurídicu que requier la llingua asturiana: la oficialidá”.
 

Contador Estadistiques