La Direutora Xeneral de Política Llingüística aseguró que "la mayor parte de los asturianos ven bien que se puea usase l'asturianu, pero nun quieren imposiciones nin obligaciones".

Asina, consideró que la clave de la xestión no referente a la llingua asturiana ta en "dexar l'usu del que quiera utilizala" pero ensin que traiga "imposición" al restu de la población. Felicitóse amás pol autu del Tribunal Constitucional, que reconoz la constitucionalidá de la Llei de Promoción y Usu, y anuncia que l'Executivu autonómicu va siguir "aplicando" la norma porque "garantiza un drechu", anque nun lo exerza la mayoría.
  
Asina espresóse en declaciones nel programa de RPA 'Asturias hoy', recoyíes por Europa Press. Vega esplicó que "l'autu del Tribunal Constitucional (TC), ye un puxu al llabor lexislativu del Parllamentu y confirma que se taba aplicando bien la llei. Consuelo Vega reconoció qu'esiste cada vez "mayor interés pol caltenimientu y promoción de la llingua rexonal". Afirmó: "l'autu del altu tribunal dizmos que la llei que tenemos, la llei de promoción del asturianu, ye una llei constitucional, y vamos siguir aplicándola".
  
Consuelo Vega recordó que n'Asturies esiste la "voluntá coleutiva de caltener la promoción y recuperación del asturianu nun marcu que nun cause resquiebra ente los distintos sectores de la sociedá". "La clave ta", añadió, "en  dexar l'usu de los que quieran utilizalu, pero qu'eso nun suponga una imposición pa otra parte de la sociedá que prefier manexase en castellanu".
  
La Direutora Xeneral de Política Llingüística reconoció que nun ye muncha la xente que se dirixe a l'Alministración n'asturianu, pese a que ta almitíu dende l'aprobación de la norma d'usu y promoción del asturianu. Esta llei, precisó Vega, "garantiza un drechu con independencia o non de que lu use la mayoría".
  
Na sociedá, indicó, "hai un respetu pol asturianu siempre que nun suponga obligatoriedá". "La mayor parte de la xente ve bien que se puea usar l'asturianu, qu'haya música, lliteratura, que se puea dirixir a l'Alministración el que quiera, pero la mayor parte de la sociedá asturiana tamién tien claro que nun quier obligaciones nin imposiciones. Présta-y esta situación de voluntariedá, ye un permisu pal que lu quiera pero non una obligación pa naide", apuntó Vega.
 
Interés creciente
 
Sobre l'interés qu'espierta la llingua del país na población, la Direutora Xeneral de Política Llingüística destacó que creció nes últimes décaes y "son los nuevos los que se planteguen de manera más consciente la necesidá de caltenelu y recuperalu". "Les últimes encuestes realizaes sobre l'usu del asturianu na población revelen, en pallabres de Vega qu'hai un porcentaxe bien altu que lu entiende, pero los datos baxen considerablemente ente la xente que lu fala", comentó.
  
Onde ta creciendo la presencia del asturianu ye nos centros educativos, según indicó Consuelo Vega: "L'aceptación ye mui alta nos colexos, en Primaria son munchos más los alumnos que cursen asturianu que los que nun lo cursen". Amás, matizó que "la lliteratura infantil y xuvenil nos últimos años ta desarrollándose extraordinariamente porque hai demanda", matizó.