Ciañu 2010, ente soc.culture.asturies y Ximiélgame

|

En Ciañu hubo tiempu pa falar de los primeros pasos de la llingua na rede y del camín per onde tien que dir, señalando a Ximiélgame como’l futuru del ciberespaciu n’asturianu.

 El II Sidra&Blogues entamaba a les 17.00 hores nos esteriores de la Casa de los Alberti de Ciañu (Llangréu), onde la Banda de Gaites Escuela de Musica Tradicional de l'A.P.A. del Conservatoriu Valle del Nalón dio entamu al actu colos sones más tradicionales del país.

Darréu, l’espertu n’Internet, direutor de la zona atlántica de Prensa Ibérica y co-fundador d’Asturies.com, David Guardado, faló de les primeres apaiciones de la llingua asturiana na rede y plantegó l'añu 1996 como'l momentu en qu'una riestra d'iniciatives entamaron a desendolcase.

Comentó como nel añu 1995, na revista n'asturianu XyZ yá s'espublizara un artículu falando de la rede y dende la Universidá d'Uviéu, el profesor Xelu Neira, ún de los coordinadores d'Eslema, y el daquella becariu, Óscar Fernández Sierra (agora nel equipu d'Elpais.com depués de pasar per Soitu), incluyíen na web de la Universidá d'Uviéu, una de les poques páxines asturianes na rede, informaciones del suplementu d’El Comercio, Alitar Asturies.
 
Dende años enantes esistía amás una llista de corréu, Astur-list, que moderaba'l tamién profesor universitariu Rubén Zurita, y na que la llingua asturiana tenía una presencia compartida col castellanu.
 
Según Guardado ún de los finxos pa la llingua nel añu 1996 ye la creación de soc.culture.asturies nel mes de febreru, “un grupu de noticies a traviés del cual tol mundu podía tener accesu a información y comentarios sobre Asturies y sobre la llingua asturiana”. La creación d'esti grupu de noticies, que nel momentu yera daqué mui importante pa la comunidá, porque daba-y una visibilidá de primer nivel na rede a Asturies y la so cultura, debése-y a un grupu de persones encabezaes por José Antonio Corrales, otru profesor universitariu que pue considerase pa Guardado, ún de los "pás fundadores" d'Internet n'Asturies, y que siempre tuvo un procuru personal porque la llingua asturiana entrare con normalidá nel mundu de les nueves tecnoloxíes.

Al final del añu 1996 apaecen tamién les primeres webs en llingua asturiana; Espaciu y Tiempu, l'antecedente d'Asturies.com, el mediu de comunicación n'asturianu que tien presencia ininterrumpida na rede hasta güei, y Asturnews, otru proyeutu que podemos atopar güei na rede y que tuvo daquella p'acá una presencia intermitente na web.
 
Depués llegó la sorpresa de la xornada cola presentación oficial de Ximiélgame, de la mano de Mikel González, que cuntó como nos Install Party la xente entrugába-yos que por qué nun traducíen Facebook, cuando “Softastur nun ta pa traducir plataformes privaes”. Asina qu’entamaron con Ximiélgame, que quier suplir un de los munchos furaquinos que faltaben n’asturianu. Mikel desplicó que nun futuru tamién cuenten meter otres llingües pa que la páxina nun seya dalgo zarráu. Del mesmu mou, nun quixo afitar una fecha d’apertura pública de Ximiélgame, yá que tán desendolcando’l proyeutu nos ratos llibres, anque cuenten abrilo nunes díes.
 
Llueu, l’espertu n’internet y diseñador de la campaña “Doi la Cara”, Poli Mencía, faló de les formes d’interacción qu’usen los usuarios na rede, poniendo como exemplu’l casu gallegu, una comunidá que tal mesmu nivel qu’una llingua normalizada, “n’Asturies tovía vamos unos cuantos pasinos per detrás”.
 
Dixo tamién que nel país vecín hai más blogues en gallegu qu’en castellán, “facelo en gallegu convirtióse en dalgo `cool´”, señalando tamién como la comunidá de páxines personales na llingua de Rosalía tien el nome de “blogomillo”, agrupando embaxo d’un paragües, “el del nome”, a tola comunidá.
 
Tamién comentó la importancia de chuza, l’esbilla gallegu, que ñació en 2006 y que según Mencía mató al blogomillo, “tola actividá que se desenvolvía nes blogues, pasó a chuza, ye la páxina qu’axunta a tola rede en gallegu”. Una paxina de referencia, que nel casu asturianu espera que nun futuru seya Ximiélgame, onde los usuarios interacciones ente ellos y permita espardese per otros filos fuera de la propia páxina.
 
Señaló que la campaña de “Doi la cara” tenía l’enfotu d’interaccionar col restu de xente de la rede, mostrando caminos pa entamar a usar la llingua na rede, "nun too ye Facebook, Google o Asturies.com”. Según Poli Mencía, la comunidá asturiana na rede necesita falar más y xenerar llazos, "faciendo una comunidá munchos más fuerte y que la xente entame averase por simpatía”.
 
Pa finar les charres, el responsable del blogue “Ta pa Ponga” y espertu en software llibre, Marquinos, faló de les ventayes y desventayes de les plataformes más usaes ente los blogueros asturianos, señalando que namás permiten usar l’asturianu wordpress.org y nireblog. Comentando que wordpress.com que tien entamáu’l procesu de torna al asturianu, mientres que Blogger ye de Google, “y nun almite la llingua”.
 
Finaes les charres, vinieron la entrega de los Premios al Meyor Blogue 2009. Chus Solís, en nome de la bloguesfera n’asturianu, foi l'encargáu de dar el premiu al meyor diseñu a “El Xanu’l Caborniu”. Mientres qu’Inaciu Galán de Xareos! Xestión Cultural entregó’l tercer premiu a “González y González”, y Marquinos, en nome de Softastur fixo lo mesmo col segundu, que foi pa “La verdá ye mentira”. Pa finar, el responsable del serviciu de normalización de Llangréu, Eloy Antuña, foi l’encargáu d’entregar el Premiu al Meyor Blogue 2009 a “El Xanu’l Caborniu”.
 
El pieslle a la xornada llegó cola sidra que daba títulu a la celebración, onde blogueros y asistentes tuvieron tiempu pa siguir aldericando, nun ambiente muncho más informal ente culete y culete, sobre pasáu, presente y futuru de la rede n’asturianu y d’asturianismu en xeneral.
 
El día depués del Sidra&Blogues

Contador Estadistiques