El día depués del Sidra&Blogues

Si la mesmísima TPA faló del II Sidra&Blogues, los blogueros del país qu’asistieron al actu de Ciañu nun podíen dexar de comentar la xornada nes sos páxines personales.

Un de los organozadores, Tin Seoane, del bogue TrayasgayA, comenta que’l II Sidra & Blogues yá ye hestoria y pasa a formar parte d'una páxina más del llibru familia de la nuesa bloguesfera. “Podríamos facer un balance, valoraciones y sacar conclusiones, pero de xuru que nun díbamos a ser oxetivos, entós vamos dexalo pa otra xente. Lo que sí podemos dicir ye que nos prestó enforma”, señala.
 
Sobre’l resultáu de la organización, Seoane comenta qu’una cosa que-yos llamó l'atención foi'l repartu de xeres que se fixo ensin falar una pallabra, “caún sabía lo que tenía que facer, nun facía falta dicir nada, toos sabíamos cual yera l'oxetivu y onde se podía ayudar”.
 
El ganador del segundu premiu del concursu de blogues, “La verdá ye mentira”, señala que si dalgo rescampla nun día asina, “ye qu'en 2010 l'asturianu vive na rede cola mesma naturalidá qu'esiste en cualquier estaya de la nuestra sociedá: con puxu, calidá, arguyu y futuru”.
 
Mientres que’l ganador del premiu más importante, el meyor blogue de 2009, "El Xanu’l Caborniu", camienta al pasar la xornada “cuando van aposentando les imáxenes y sensaciones del eventu, quédame la impresión de que pasare na tarde d'ayeri una xornada afayadiza y prestosa arrodiáu de bona xente”.
 
“La verdá ye mentira” comenta coses de les charres de chigre que punxeron pieslle a la xornada, quedándose con una propuesta de Premiu al Meyor Trolleú, “toos sabemos quién lu diba ganar ésti”, y un esmolecimientu compartíu “sobre la llibertá d'espresión na rede y les nueves llexislaciones coercitives, cola anéudota xenial que mos contó David Guardado sobre una radio n'alemán nun pueblu de la Cuenca y col gustu d'afayamos ente collacios, dalgunos de vieyo y munchos de nuevo”.
 
Mientres qu’El Xanu diz qu’emprimaron a circular los culinos y coses pa picar, “siento tener que dicivos que nun vos puedo informar del númberu de botelles que los ellí presentes traseguemos, porque esti datu pertenez a los grandes secretos d'estáu pesllaos baxo milenta llaves”.
 
Amás de los comentarios del II Sidra&Blogues, Marquinos, apúrrenos dende "Ta pa Ponga", la charra que fixo sobre la escoyeta de plataforma, y dende la cuenta de Flick de TrayasgayA podemos ver una galería de semeyes de tola xornada. Dientro poco, tamién van tar en Youtube los videos con toles charres.