Xuanxo Mariño; “Si tenemos que parar siguiremos per internet”

Cola nueva llei del audiovisual, les radios ensin llicencia van vese obligaes a pesllar. El direutor de Radio Sele esplica que la emisora uvieina siguirá al traviés d’internet si tien que dexar el dial, amás de señalar que dan por perdida la llicencia d’emisión.

La Llei Xeneral de la Comunicación Audiovisual foi aprobada pola Comisión Constitucional del Congresu de los Diputaos el pasáu siete de xineru, colos votos a favor de PSOE, CiU y Coalición Canaria. Pa Mariño, la nueva llei taba pendiente desde va años pero naide quería tocar el tema y foron les radios privaes les qu’aprovechando la crisis fixeron que saliera alantre.
 
Mariño afita que les primeres que tienen emisores pirates son les cadenes privaes “y dicen que lo faen pa lluchar contra les demás que nun tienen llicencia”. Amás, esplica que Radio Sele nun ye una emisora pirata, sinón comunitaria “y estes emisores tán sofitaes pola Comunidá Europea”.
 
Según Mariño, les concesiones radiofóniques son siempre pa los mesmos y nun s'abre'l tercer sector de comunicación “que llevamos pidiendo les emisores comunitaries dende va 30 años y que s’acaba d’aprobar agora mesmo n'Arxentina”. Esto supondría llendar una parte del dial pa les emisores culturales. Sicasí señala que los gobiernos siempre quieren que los medios de comunicación falaos sían afines y nun apaezan voces discordantes.
 
Radio Sele tovía nun sabe qu’actitú va tomar énte’l cambiu nel sector, anque’l so direutor señala que si tienen que dexar d’emitir pola fm siguirán per internet “y volveremos a la fm namás que podamos”. Sicasí nun se muestra mui preocupáu yá qu'afita que “colos gobiernos socialistes siempre tuvimos munchos problemes pa emitir”.
 
Sobre l’asuntu de la llicencia, Xuanxo Mariño esclaria que se perdió, “ya que’l gobiernu fixo lo posible pa que non saliere esto alantre”. El direutor de la emisora recuerda que la persona encargada de quita-yos la llicencia foi Javier del Olmo, daquella xefe de telecomunicaciones de Principáu, ex Conseyeru d’Industria de Cantabria y que ta acabantes de ser condenáu a ocho años d'inhabilitación pa cargu públicu  y dos años y ocho meses de cárcel por delitos de prevaricación y obstrucción a la xusticia cometíos mientres yera presidente del Puertu de Santander.