Xuristes pide la igua de la "faltona discriminación" de Llanera

Xuristes pol Asturianu, tres tener conocimientu del casu de Llanera, desixi-y al Alcalde que tramite’l pidimientu y retire la delegación de competencies a quien nun cumple cola llegalidá.

L’Aconceyamientu calificó de “discriminación llingüística faltona”, que la Conceyala de Cultura y Muyer de Llanera, Belén Rodríguez López, nun ceda l’usu d’una sala de la Casa Cultura a la organización Fai! por presentar l’escritu n'asturianu. Pa Xuristes, l’actitú de la Conceyala ye “intolerable nun cargu públicu d’una Alministración democrática”.
 
Poro, encamiéntan-y a l’Alcalde de Llanera a tomar les midíes afayadices pa “cortar pela freba colos despropósitos burocráticos denunciaos pente medies d’ordenar darréu’l trámite y resolución del pidimientu y retirar la delegación de competencies a quien nun sabe facer un emplegu axustáu a drechu, tolerante y democráticu de les mesmes”.
 
Xuristes pol Asturianu camienta que l’Ayuntamientu de Llanera ta vulnerando gravemente cuatro drechos de la ciudadanía. Primeru, el derechu a nun ser discrimináu per razón de la llingua, “porque la Conceyala entendió dafechu lo que se-y pidía, talu que lo acredita la rempuesta que dio, polo qu’ésta, nos sos términos, nun pue tener otru oxetivu que la discriminación llingüística”.
 
Segundu, el drechu al emplegu na vida pública de la llingua rexonal, dientro del territoriu del que ye propia y tradicional, calificáu como derechu imprescriptible y recoyíu na Carta Europea de les Llingües Rexonales o Minoritaries. “Esti Conveniu Internacional foi robláu por España, gobernando’l Partíu Popular que tamién lo fai güei en Llanera”, señalen.
 
Como tercer puntu, falen del drechu a empobinase n’asturianu a l’Alministración municipal, reconocíu na Llei d’usu y nel réxime xurídicu de les Alministraciones Públiques y del procedimientu alministrativu común. Pa finar citen el drechu a ser tratáu con respetu peles autoridaes y funcionarios, “obligaos a facilita-y l’exerciciu de los sos drechos” esclarien.
 
Dende l’Aconceyamientu, camienten que’l gobiernu local de Llanera actuó “como si entá tuviere vixencia’l Decretu 2929/1975, testu aprobáu pela dictadura franquista pa regular, torgar más bien, l’usu de les llingües rexonales españoles”.
 
Del mesmu mou, dicen llamentar los fechos, tres denunciar un casu asemeyáu en Xixón nun fixo’l mes. Lo que pa Xuristes amuesa la discriminación llingüística que vienen careciendo los ciudadanos asturfalantes nos sos trámites burocráticos.
 
En Llanera namás "en castellano"