En Llanera namás “en castellano”
|
11 Febreru, 2010 por Damián Barreiro
- Inicie sesión o rexístrese pa espublizar comentarios
Fai! denuncia que’l Conceyu de Llanera torgo-yos l’usu de la Casa de la Mocedá por solicitala al traviés d’un escritu n’asturianu, poro, convoquen una concentración esti sábadu.
Tres pidir l’usu de la Casa la Mocedá de Posada al traviés d’un escritu n’asturianu dirixíu a la conceyala de Cultura y Muyer, Belén López, la funcionaria d’alministración desixó la presentación del testu en castellán, negándose la militante de Fai! ya instando a que se-y devuelve per escrito una contestación oficial.
Díes depués, la militante recibió una fueya onde la conceyala popular espón que l’escritu onde soliciten l’usu de la Casa de Cultura “debe de presentarlo en Castellano”, asina, en negrita y subrayáu. Lo que pa Fai! supón una violación de los drechos de los asturfalantes y de la llexislación vixente.
Énte esto, Fai! tresmitió al Aconceyamientu de Xuristes pol Asturianu (AXA) un dossier con una rellación de los fechos pa que dende l’asociación “tomen les midíes oportunes no que cinca a la defensa llegal de los drechos llingüísticos”.
Amás, convoquen una concentración col llema “Democracia pa Llanera; pol usu de los espacios públicos y escontra la represión llingüística”, onde van denunciar la prohibición d’usar l’asturianu cola alministración local y “la bayura de despropósitos y neglixencies alministratives per parte de los rexidores”, en referencia a les torgues que según Fai! tán poniendo dende’l Conceyu pa cede-yos l’usu d’espacios públicos. La concentración va celebrase esti sábadu 13 de febreru a les 12.30 hores delantre l’ayuntamientu en Posada.
La organización fai un llamáu al sofitu y a la participación de toles persones y organizaciones que “vienen careciendo los métodos antidemocráticos de la corporación dirixida pol popular José Avelino Sánchez”, asina como a les qu’en toa Asturies sufren les mesmes discriminaciones per parte de l’alministración pol fechu d’espresase n’asturianu.
Dende Fai! quieren dar les gracies a los Vecinos d’Agüera, Conseyu de la Mocedá del Principáu d’Asturies, UNA Mocedá, Izquierda Xunida de Llanera, Aconceyamientu de Xuristes pol Asturianu y a tolos ciudadanos qu’a títulu personal ufrieron el so sofitu.
Llanera torga la celebración d'un actu de Fai! na Casa Cultura
Fai! agradez les muestres de sofitu tres nun poder celebrar la so asamblea
| Adxuntu | Tamañu |
|---|---|
 Rempuesta del Conceyu de Llanera.jpg | 263.83 KB |
Efrén d'Andrés
Lo + visto de la selmana
Comentarios
Onde ta Llanera ? Ta n'Asturies y la Llingua tien tantu drechu, como'l castellan.
El castellan imponxeren-lu , la Llingua falamos-la da cuantos seglos fai!!!
Que se entere la conceyala ,y abra los güeyos a nuesa realida.
Si non fala asturianu, que lu deprenda!!
La casa'l conceyu de Llanera tá tomada por unos anti-asturianos. Llanera tá nel corazón d'Asturies y la so xente fala y entiénde perfeutamente la so llingua. Non necesita dictadorinos acomplexaos pa con la so cultura.
Dan-me pena, como diría la mio güela, en paz té, ¡Vaya por dios!
Nun fai falta que lu deprenda, pachu, namás que lu respete.
Gustaríame saber si AXA y Fai! van denunciar el tema onde tien que ser, en xulgáu. Hai que llevar la Llei d'Usu y Promoción hasta l'estremu enantes de que la valtien na prósima llexislatura.
Otramiente, hai que da-yos la norabona a los militantes de Fai! por exercer los sos derechos y a AXA por tar lliderando la llucha llegal escontra la discriminación llingüística. Ente esto y el casu d'hai poco en Xixón, paez que por fin tamos esconsonando y siguiendo'l conseyu de Xose Nel Riesgo:
"Pues éstos tienen d’enterase que les llingües nun muerren si los sos falantes nun quieren.
Y nos tenemos d’enteranos que’l peor enemigu de la llingua ta en dientro de nos, y llámase mieu. Si, MIEU: si nun somos quien pa enllenar de solicitúes de cambiu de los nuesos nomes a les versiones tradicionales los rexistros civiles, pa dir depués colos correspondientes certificaos a les comisaríes, a les oficines de Tráficu, a la Universidá, al Ayuntamientu, al Bancu pa quitanos d’enriba complexos impuestos y dar a estampa los nuevos documentos d’identidá con arguyu… si nun somos quien pa paralizar l’Alministración con escritos n’asturianu y contenciosos a mamplén por nun atendenos, si nun somos quien pa proyeutanos en carne y güesu más p‘alló de les manifestaciones coleutives de turnu, la llingua nun sedrá quien pa sobrevivinos."
Asina que toos y toes a la xera. Valió yá.
Por cierto, échase de menos la presencia de la Xunta pola Defensa de la Llingua Asturiana nestes coses. Antaño yera la organización que más se movía polos derechos llingüísticos, pero hai unos meses qu'amuesen un perfil perbaxu... Estráñame.
Asturies merez respetu!