USIPA defende a la funcionaria que fixo risión del asturianu
|
7 Febreru, 2010 por Damián Barreiro
- Inicie sesión o rexístrese pa espublizar comentarios
El sindicatu USIPA denuncia que l’Ayuntamientu de Xixón ye’l máximu culpable nel casu de discriminación llingüística, “yá que la funcionaria nun tenía la formación necesaria”.
Pa la Unión de Sindicatos Independientes del Principáu d’Asturies, l’Ayuntamientu caga la so responsabilidá sobre una trabayadora que nun tenía la formación pa desenvolvese nesa situación.
Señalen que nun se trata d’una funcionaria, “sinón d’una persona contratada al traviés del Inem con un contratu basoria de curtia duración y baxu sueldu, colos que’l Conceyu cubre les vacantes”.
Pal sindicatu, l’Ayuntamientu punxo a la trabayadora nun puestu reserváu a funcionarios, “nel qu’hai que manexar una cantidá grande d’información y tener conocimientu de tol Ayuntamientu”.
Pa finar, espliquen que tolos problemes orixinaos vienen de les deficiencies de la propia organización, y qu’estos “nun se puen cargar sobre una trabayadora de la más baxa estructura”.
Espediente disciplinariu pa la funcionaria que fixo risión de la llingua
Efrén d'Andrés
Comentarios
Quiciás seya ciertu lo que diz USIPA sobre les condiciones llaborales de la trabayadora; nun sedría d'estrañar, pero'l ciudadanu nun tien culpa d'ello. Pero'l casu ye que la que se burlló y fizo risión del ciudadanu y de la llingua asturiana, y quixo tracamundiar un nome legal foi ella. El respetu a los ciudadanos nun depende del tipu de contratu, nin del valor del sueldu, nin de la formación profesional de la persona que ta trabayando nel Ayuntamientu.Y, a menos que demuestre que l'Ayuntamientu de Xixón mandó-y facélo asina, la so responsabilidá ta ehí. El restu, son ganes d'embilortar l'asuntu.
Eso ye lo que siempre se conoció como "salir pela tanxente". Si la funcionaria esa se rió y fizo burlla NAMÁI ella ye la responsable porque, entós, tolos funcionarios puen facer la risión a cualquiera que vaya a una ventaniella?
Lo que tien que facer l'Ayuntamientu ye sancionala por una falta mui grave de discriminación y xenofobia. Y los nacionaliegos axuntase d'una puñetera vez pa tener pesu políticu y qu'esto nun ocurra.
Francamente paezme a mi qu'esti asuntu más ta sirviendo pa que los funcionarios del Ayuntamientu entonen el "ves, yá vos lo dicía yo, lo del asturianu nun val más que pa que s'imponga" fomentando asina la tesis de los que defenden que la oficialidá va sirvir pa más obligatoriedá.
Cuento con que nun se ta xestionando bien dende los que ficieron la denuncia (¿Por qué esi interés por nun quedar nel anonimatu como suel ser nos casos de discriminación llingüística?) a por supuestu l'Ayuntamientu, que tendría de preocupase más por cumplir el cacarexáu Plan de Normalización. Si realmente quixera resolver les coses "normalmente" enantes de buscar una cabeza de turcu hubiera abierto una investigación seria sobre esti casu qu'esclariara qué fue lo que pasó realmente, y una vez fecho esto actuar en consecuencia coles sanciones convenientes.
Anque por supuestu, y creo qu'esto naide pue duldalo, si'l gobiernu municipal de PSOE-IU tuviere un verdaderu interés por facer normalización en serio esti tipu de despropósitos nunca nun pasaríen.
Pero vamos a ver, si algunu ve una "obligatoriedá" o "imposición" en tramitar un escritu normalmente ensin reise del ciudadán y en tacha-y el nome porque ta n'asturianu ye que nun ta bien de la cabeza, nun se puede faltar al respetu a la xente tando cara'l públicu, seguru que munchos d'esos funcionarios taran fartos de reise de xente que vien de pueblos y aldees, que sienten vergoña de nun poder falar más que n'asturianu y que nin siquiera piensan que puedan tener derechos, asina que ta bien que s'entame a planta-yos cara, que vean qu'eso nun ye una conducta tolerable d'un trabayador de l'alministración; el to razonamientu de que val más callar y dexar que siga too igual parezme vergoñoso, sicasí seguru que tamien habrá quien pueda sentise ofendíu y sentir como una imposición ver una señal n'asturianu nuna carretera o poner la radio y sentir falar na nuesa llingua, yes como los que dicen que nun se pueden poner al dreches los nomes de los nuesos pueblos porque sinon "igual se pierde algún turista".
Si pienses que'l mio racionamientu ye que siga too igual ye que nun entendiste nada del mio razonamientu.
El razonamientu ye que yá ta bien de facer les coses ensin seriedá. Cuando un funcionariu comete una falta grave lo normal ye abrir una investigación pa saber qué fue lo que pasó realmente. Ye igual que si un paciente diz que'l médicu lu llamó idiota y la dirección del centru nun fala nin col paciente nin col médicu pa saber qué pasó realmente y pese a too, actua en consecuencia.
Digo que tal y como se xestionó'l tema paezme mui poco serio y tamién que, a la fin, por esa xestión, fizo un flacu favor a la causa de la defensa del asturianu, esa defensa que debería fundamentase en que los falantes d'asturianu tengan los mesmos derechos que los de castellán, lo que dexa implícito por supuestu la igualdá de condiciones y el fechu de que nun se-yos falte al respetu.
Poro lo primero que tedríemos que tar pidiendo ye que s'esclarien les circunstancies d'esti socesu y que una vuelta esclariaes, y si ye que los acontecimientos fueron asina, se pidan responsabilidaes, pero non solo a la funcionaria, sinón tamién al más altu nivel. Pero non, en llugar de razonar esto preferimos dicir obviedae. Pues nada amiguinos nesti plan siguiremos siendo siempre la risión pa unos y la peste negra pa otros.
Tola razón, nun tener formación en llingua asturiana nun tien ver con facer risión de les persones.
A Repunante y a min abúltanos una faltosada'l dicir que la funcionaria nun tenía la formación necesaria, poro ¿nun tien la formación necesaria pa qué? ¿Pa nun caltener la risa? Nun camiento qué fadría con un probe tartamudu (cuspí-y na cara y pegar al so fíu de xuru) o con un negru ("non, non, en raza vusté ha poner blancu" ente rises...nun maxináis la escena?).