Soliciten que la RAE camude la so definición de franquismu

|

L’Asociación pa la Recuperación de la Memoria Histórica quier que la RAE camude la so definición de “franquismu”, al considerala l’asociación demasiao feble. Poro, lleven selmanes recoyendo ente los sos socios definiciones del términu.

Pa la Real Academia Española, el franquismu ye un "movimientu políticu y social de tendencia totalitaria, entamáu n’España mientres la Guerra Civil de 1936-1939, en torno al xeneral Franco y que derivó nun réxime dictatorial desarrollao mientres los años qu’ocupó la xefatura del Estáu".
 
Esta definición nun convence a l’ARMH, qu’entamó una campaña pa pidi-y a los sos asociaos definiciones de “franquismu” y asina esixir a la RAE una nueva definición del términu. En menos de dos meses l’asociación recoyó 157 propuestes.
 
De toles definiciones recibíes, en 67 nómase la pallabra dictadura, en 61 fascismu, totalitarismu en 56, golpe en 49 o 40 en militar, siguíes por ilesia, violencia, exiliu, represión y crime, ente otres.
 
Nel casu asturianu, el DALLA, nun recueye tampoco nenguna de les pallabres más usaes polos socios de l’ARMH. Asina, l’Academia de la Llingua define’l franquismu como “réxime políticu dirixíu por Francisco Franco yperiodu de gobiernu de Francisco Franco”.
 
¿Diccionariu machista?
 
E 1998, nun estudiu del Institutu de la Muyer, tituláu “Lo femenín y lo masculín nel Diccionariu de la llingua de la RAE”, afitábase que lo propiu del xéneru femenín tien un tratamientu discriminatoriu nel diccionariu español, mientres que lo masculín ye’l centru sobre’l que xira too.
 
Les autores del estudiu, esclariaben que’l diccionariu paez un diálogu d’homes ente si, onde les muyeres namás que s'asomen como una subespecie dientro d’un universu androcéntricu. Según les autores, analizando namás que’l 5% de les entraes pue vese que les muyeres tan representaes nun 7% de los casos y los homes nun 88%, mientres que’l 7% restante ye una presencia compartida. Nos exemplos namás que’l 11,1% incluye a les muyeres.
 
Más nidiu quedaba esi falocentrismu cuando se miren les cites d´actividaes profesionales femenines; monxes (13 cites), maestres (10), prostitutes (8), dames o reines (7) y sirvientes (5). Tamién pue vese en delles entraes de definiciones profesionales que’l rol de la muyer ye pasivu, asina la presidenta, la ministra, l'abogada, l’alcaldesa ya inclús la chigrera son “la muyer de”.
 
El coleutivo gai tamién llega tiempu lluchando pa que’l diccionariu de la RAE recueya matrimoniu como la unión ente dos persones, y non namás como home y muyer. Tamién denunciaben qu’en dalgunos terminos había definiciones peyoratives pal coleutivu, asina, nel diccionariu fálase de “pederasta” como’l que práutica la sodomía.
 
Academia y Xega rescamplen l'ausencia d'homofobia nel DALLA

Contador Estadistiques