Nava acueye la esposición del VII Concursu de Cómic

La Casa de Cultura Marta Portal de Nava acueye hasta'l próximu día 29 de xineru la esposición que recopila los meyores trabayos presentaos a la VII edición del Concursu de Cómic n'asturianu qu'organiza añalmente la Comarca la Sidra.
La esposición ta compuesta por diez de les meyores histories de la edición del 2009, ente les que s'atopa, como ye natural, la obra ganadora que se presentaba sol títulu "Nel día de la victoria". L'autor d'esti cómic ye l'ilustrador de Mieres José Juan González García, que cuenta una historia ambientada nun Nueva York apocalípticu pente medies d'una obra fecha a llápiz y carbón cola que l'autor amuesa'l so dominiu del espaciu y la narrativa gráfica.
Asina mesmo na amuesa van poder vese los dos accesit concedíos pol xuráu al ilustrador Enrique Carballeira pola obra de creación "3.0", una historia galáctica enllena d'ironía; y al diseñador gráficu Diego Bernardo Álvarez pola so obra "Fuñería", una historia d'humor que parte de personaxes mitolóxicos asturianos.