La Mar

Aprovechando una esposición que tuvo llugar en Xixón, La mar nun espeyu: Evaristo Valle y Nicanor Piñole pa, de la mano de los dos pintores asturianos más señeros de la primera metada desti sieglu, facenos gavilota y empapános de sal . La mar ye un tema habitual na obra destos dos grandes artistes.

Valle y Piñole capten un de los principales aspectos del paisaxe humanu d'Asturies: los tipos y personaxes qu'habiten a orielles del Cantábricu, los oficios de la mar, la vida que transcurre nel puertu o la playa . La mar de la pintura ye la mar de la calma, comu una llastra ñidia, un cristal, qu'espeya lo que tien alredor. Y asi vemos Asturies dende la mar, 340 km. de costa con más de 200 playes d'arena fina, negra pola pizarra al occidente, blanca pola caliza al oriente, grandes y pequeñes, turístiques y vírxenes.. Y más de 20 puertos, la mayoría pesqueros, coles casines pendientes, asomáes a la baranza, calteniendo la tierra, xixilantes. Ensin contar los accidentes naturales, la sucesión d'entrantes y salientes que rompen la llínia del perfil costeru, cuasi rectu sinon fuera pol cabu Peñes, el cabu Torres y otros llonxanos , y les ríes que del Eo a Tinamayor van sucediéndose. Ye la mar na baxamar, la qu'afala a caleyar pente'l pedreru , mariscando.

Fae casi 9.000 años los asturienses poblaben la cornisa cantábrica y distinguíense por ser consumidores n'altu grau de mariscos y moluscos, especialmente llámpares, bígaros, moxones, oricios.. hay coses que nun cambien col tiempu. L'aprovechamientu los recursos marinos mantiénse inda güei. Nun ye raro ver polos pedreros xente piescando cola subida la marea, coles ñases, los trueles o les manes .

Mar abuxaracá, qu'avienta los pescaos nel suelu la rula y esparde pescaderes peles calles. Porque la mar nun sólu da sustentu, da también trabayu. La piesca ye una forma de vida pa munches families. El puertu de Cuideiru abelluga la mayor flota pesquera d'Asturies, na so mayoría artesanal, dedicada a la piesca la merluza'l pinchu. El mayor volumen de les captures destínase al consumu familiar, aunque importamos el doble. Nos numerosos puertos asturianos, la piesca dió pasu al esporpolle de la industria conservera.Ye'l casu de Candás, qu'hasta la década los 60 fue un puertu perimportante. Dende los años 30 na so rula fixabase'l preciu del bocarte y el bonito pa tol Cantábricu, comu consecuencia del gran númeru de fábriques conserveres de pescáu --ocho-, que llegó a tener . Esta industria, n'otros tiempos puntera, vió cerrase nos últimos años varies fábriques -agora'n Candás, sólu queden dos-, anque últimamente paez que se nota alguna recuperación nel sector, asociáu a les conserves artesanes d'alta calidá. Y equí tá la mar que se engafenta, somorguiando los barcos na galerna. Nun hay un inviernu ensin naufraxos; entoavía esti primer día del añu, la vagamar semó'l desastre na flota Puertu Vega. La mar trága los barcos, y a la ruina familiar suménse delles veces funestes consecuencies ...

Los pintores pinten homes y muyeres cola mar de fondu, cola mar nos güeyos,colos güeyos na mar. La pintura ye l'espeyu onde se reflexen los tipos humanos, les costumes, los vezos, la faena... formes de ser y de vivir , retratos d'un pasáu que ye presente enagora, y que llucha por ser futuru. Dafechu, l'espoxigue la actividá pesquera ye fundamental pa la diversificación de la economía rexonal. Nestos tiempos de reconversiones, blanca, de la llechi; gris, del fierru; prieta, del carbón, quiciaves l'azul de la mar seya'l color alternativu, si dexamos dalgún díi de contaminala.

La mar del emigrante. Héstóricamente un últimu recursu pa los asturianos foi la emigración. El movimientu migratoriu d'asturianos p'America fue particularmente intensu durante el último cuartu de siglu pasáu y el primer terciu desti. Homes y muyeres expulsáos del paraísu natural , cargáos de ilusiones, lixeros d'equipaxe, cruzaben el charcu sin saber si diben ni a llegar a puertu. Pa los que queden, la mar ye'l filu umbilical , la llave l'alcordanza; l'orbayu salobre de les llárimes, el ruxeruxe ensin fin de les ausencies.

Pero la mar ye tamién el descansu y el ociu, un xuegu pa los neños. El veraniar xunto la mar ye una costume relativamente reciente, que empezó'l sieglu pasáu como talasoterapia y a fines desti ye'l pegollu d'un de los sectores más florecientes del Principáu. Asociáo a los meses de verano espolleten la hostelería y el turismu. El gran númeru de visitantes puede disfrutar amás nestes feches d'un sinfín d'actos culturales, romeríes y folixes que conviden a echar el cuerpu a la calle 'l día y la nueche.
Dicivos, p'acabar, que, como dixo'l poeta mar ye palabra de tierra adientru/. Nun decir el mar, decii la mar/ acostumáivos a llamala col nome que-y punxo/ la mano que la sabe ya en sin vela/ el güeyu fechu angüeña de mirala.

Asturies, fía del agua, nun puede esmolecese d'amparala. El recáu de güei, ye ecolóxicu, ye vital: tenemos que prometé-ios a los fíos de los nuesos nietos y a los sos fíos, que alcontrarán la mar de les pintures comu taba, que seya dafechu la mar comu'n espeyu. Curíaila.

Pilar Sánchez Vicente